Tahiri me homologun francez: Forcim të bashkëpunimit kundër terrorizmit

28 Shkurt 2017, 12:04, Aktualitet CNA

Gjatë takimit që Tahiri ka mbajtur me homologun francez, është shtuar nevoja për një bashkëpunim kundër terrorizmit. Gjatë një konference për mediat mesditën e sotme, Ministri i Brendshëm, Saimir Tahiri, tha se dy vendet janë të angazhuar për të luftuar terrorizmin, krimin e organizuar dhe luftën kundër korrupsionit. Ministri Tahiri shtoi më tej se ka informuar homologun e tij francez Bruno Le Roux lidhur me domosdoshmërinë që kemi për reformën në drejtësi, vettingun, si mënyra më e mirë për të pasur siguri dhe për të ndërtuar një Shqipëri më të drejtë.

“Kemi bashkëpunim të shkëlqyer për hapësira për të bashkëpunuar më shumë. Jemi duke eksploruar çdo mundësi për të pasur rezultate më të mirë nëpërmjet shkëmbimit të informacionit, veçanërisht në luftën kundër terrorizmit, krimit të organizuar, trafiqeve të paligjshme, sepse asgjë që ndodh në Shqipëri apo në Francë nuk është e izoluar, për sa kohë kemi të njëjtat sfida dhe kërcënime.

Ramë dakord për disa pika, më e rëndësishme sipas meje, ngritja e grupeve të përbashkëta me oficerë shqiptarë dhe franceze, që do bëjnë hetim të përbashkët në kuadër të luftës kundër krimit të organizuar, trafiqeve të paligjshme dhe parave dhe aseteve kriminale. Ramë dakord për të shkëmbyer informacion nga i cili do përfitojmë jo vetëm ne, për të pasur më shumë siguri, qoftë në Francë apo Shqipëri, por edhe më gjerë. Kemi sfida të përbashkëta sa i takon luftës kundër drogës, kundër trafiqeve. E informova kolegun për çka kemi bërë për sekuestrimin e aseteve.

Ndonëse 100 mln euro të sekuestruara në 3 vjet janë shumë më shumë krahasuar me të kaluarën, janë një nxitje për të bërë më shumë. E informova për domosdoshmërinë që kemi për reformën në drejtësi, vettingun si mënyra më e mirë për të pasur siguri dhe për të ndërtuar një Shqipëri më të drejtë.

Rastet kur sistemi i drejtësisë ka ndikuar që njerëz me krime në Francë dhe Shqipëri të lirohen, nuk ka dëmtuar bashkëpunim tonë, por rithekson domosdoshmërinë për reformën në drejtësi.

Ne jemi të vendosur të bëjmë shtet, ashtu sikurse jemi të vendosur për të luftuar korrupsionin dhe krimin e organizuar”, deklaroi Tahiri. /CityNews