Nga Kastriot Myftaraj/ Mesimi amerikan: vota prej skllavi sjell lufte civile

22 Nëntor 2016, 17:41, Aktualitet CNA

Ku në 1889 vdiq ish-Presidenti i Konfederatës së Shteteve Amerikane (Jugu skllavopronar i SHBA), Jefferson Davies, megjithëse ai nuk kishte më asnjë pushtet që prej vitit 1865, kur Jugu humbi luftën civile amerikane, dhe vetë Davies u burgos për disa kohë, megjithëse skllevërit në Jug qenë çliruar me ligj dhe ishin qytetarë të lirë, 600 nga ish-skllevërit që kishin qenë pronë e tij, morën pjesë në funeral, me vullnetin e tyre, ashtu siç do të kishin bërë të detyruar nëse ligjet e skllavopronarisë do të kishin qenë në fuqi. Të njëjtën gjë bënë edhe ish-skllevërit e skllavopronarëve të tjerë.
Kjo gjë provoi se zinxhirët e vërtetë të skllavërimit qenë në mendjen e individit të skllavëruar, jo në trupin e tyre. Kjo ngjarje është çelësi për të shpjeguar enigmën e mënyrës sesi votojnë një pjesë e madhe e njerëzve në Shqipëri. Në vendin tonë, një diktaturë staliniste për gjysmë shekulli punoi për kontrollin e popullit me anë të skllavërimit të mendjes po aq sa të trupit. Prandaj këtu njerëzit sot votojnë me mendësinë e skllevërve që shkojnë në procesion të bindur pas arkivolit të skllavopronarit të vdekur. Ata që kanë lindur dhe janë rritur e për rrjedhim formësuar mendërisht në kohën e diktaturës komuniste, infektojnë me këtë mendësi, pak a shumë, edhe fëmijët e tyre. Duhet të kalojë një kohë e barabartë me atë në të cilën u punua nga diktatura komuniste që të formësohet kjo mendësi skllavi, që të kemi njerëz të çliruar nga kjo mendësi.
Shqiptarët të cilët deri në 1990 votonin për partinë-diktaturë, e cila sundoi për 48 vite vendin, më vonë nisën të votojnë edhe për opozitën që krijoi partia komuniste (PPSH), se në nënvetëdijën e tyre po i bindeshin për inerci diktaturës, si ish-skllevërit e Jefferson Davies. Dhe pasi shqiptarët u zhgënjyen përfundimisht nga opozita e krijuar nga partia-shtet (PD), tani votojnë në pjesën më të madhe për dy partitë që e kanë origjinën drejtpërdrejt nga partia-diktaturë gjysmëshekullore. (PS dhe LSI si bijë e kësaj të fundit)
Vota e këtyre shqiptarëve ka aq vlerë legjitimuese për pushtetin e PS-LSI, sa ç? kishte vlerë prania e ish-skllevërve të Jefferson Davies, në funeralin e këtij të fundit, si argument se skllavëria ishte më e mirë se liria. Ashtu si prania e vullnetshme e ish-skllevërve në funeralin e ish-skllavopronarit ishte perversion i lirisë, edhe vota e shqiptarëve të sotëm është perversion i demokracisë.
Kur shoqëria ndodhet në një gjendje të tillë, ku një pakicë arrin të sigurojë sundimin duke manipuluar shumicën, atëherë kemi një situatë revolucionare ku legjitimohet lufta e pakicave, domethënë e pakicës sunduese dhe asaj që kërkon të sjellë ndryshim në shoqëri. Siç na tregon historia e Amerikës, kjo është një luftë civile./Kastriot Myftaraj