web counter
LEXO PA REKLAMA!

SHKARKO APP

App Store
Google Play

E fundit!

x

Një jetë plot vezëllim në skenë

23 Tetor 2016, 18:29, Aktualitet CNA

Teksa, nesër me datë 24 tetor, feston 69-vjetorin e lindjes, Riza Hoxha ky koreograf që me punën dhe talentin e tij do të kapërcente limitet gjeografike të njohjes dhe të vlerësimit, është ende aktiv në krijimtari. Ndonëse vitet e kanë mënjanuar nga skena, ku për  katër dekada me radhë dha kontributin e çmuar si kërcimtar dhe si koreograf, duke i  lënë arkivës së koreografisë shqiptare  interpretime cilësisht unikale .

Pjesëmarrës që nga viti 1968 në të gjitha festivalet folklorike kombëtare, Riza Hoxha me punën dhe përkushtimin e tij do të prezantonte numrat e tij koreografik anëkënd Shqipërisë, duke tundur skenat e evenimenteve më të mëdha artistike, si dhe duke marrë duartrokitjet e ngohta të publikut.

Veçoritë e valles pukjane si dhe vlerat tipologjike të saj janë bërë objekt i hulumtimeve të shumta të mjaft muzikologëve, të cilët pikënisjen dhe materialin burimor e morën nga prezantimi dinjitoz i shpalosjes që i ka bërë grupi i valltarëve të Pukës në manifestime të ndryshme kulturore kombëtare nën drejtimin e të mirënjohurit Riza Hoxha.

Ndonëse prej katër vitesh i dalë në pension, ai prapë gjendet i rrethuar mes  miqve të tij të shumtë të artit, mes valltarëve të panumërt që instruktoi, mes dëshirës dhe pasionit për skenën dhe zhurmat  ritmike të valleve. Ndjek  nga afër  çdo eveniment artistik duke dhënë kontributin dhe ndihmesën e tij, mbetet i pashkëputur nga zhvillimet në institucionet artistike dhe kulturore të Pukës, duke përfaqësuar një zë të fuqishëm në  mbrojtje të vlerave etno-kulturore.

Riza Hoxha u lind në fshatin Buhot më 24.10.1947, në një familje me tradita patriotike, arsimore dhe kulturore. Pas kualifikimit profesional që mori në shtëpinë qendrore të krijimtarisë popullore në Tiranë, emërohet koreograf në pallatin e kulturës Pukë, detyrë të cilën e kreu për më shumë se dyzet vite, deri sa doli në pension.

Fillimin e karrierës së tij e shënon pjesëmarrja në tubimin folklorik kombëtar të vitit 1968, duke u prezantuar me grupin e  valltarëve pukjanë që ishin pjesë e rëndësishme e formacionit të grupit artistik të Pukës.  Që në fillimet e para të karrierës, te Rizai u vërejt zelli për të lënë gjurmë pozitive, pasi shohim impenjimin e tij në organizimin e shumë ekspeditave kërkimore-shkencore në të gjitha fshatrat e Pukës, me synim pikasjen e elementëve tipologjikë dhe veçantitë e valles pukjane.

Të sjellësh në kujtesën e kohës një vlerësim për ata që i dhuruan këtij kombi ART nga jeta e tyre është një akt qytetërimi. Nuk ka dyshim, që Riza Hoxha për të gjithë artdashësit dhe veçanërisht për njohësit e folklorit, përbën një emër që denjësisht radhitet mes personaliteteve që bënë historinë e koreografisë shqiptare, duke stampuar emrin në mjaft krijime që mbajnë autorësinë dhe autencitetin e tij. Gjithnjë është vlerësuar nga juri të ndryshme për paraqitjen koreografike dinjitoze, cilësinë e interpretimeve, origjinalitetin dhe vlerat burimore, por mbetet për t?u veçuar vlerësimi i dhënë nga bashkia Pukë me datë 11.07.2006, duke e shpallur ?Qytetar Nderi? me motivacionin, “Për kontribut të veçantë në shpalosjen e vlerave koreografike të trevës pukjane në takimet lokale, kombëtare dhe ndërkombëtare?, si dhe vlerësimi që i ka bërë në kuadër të 100 vjetorit të Pavarësisë së Shqipërisë, Unioni Artistik i Kombit Shqiptar, cili e ka shpallur ?Nderi i Unionit? me këtë motivacion, ?Për interpretim me mjeshtëri të valles burimore dhe për krijimtari me nivel të lartë artistik në fushën e koreografisë, si dhe pjesëmarrës në të gjitha festivalet folklorike që nga viti 1968?.

Dhe 100 vite të tjera Riza Hoxha! Pranoje këtë urim si një përpjekje të të gjithë komunitetit të artdashësve dhe të brezave të ndryshëm për të lartësuar punën dhe veprën tënde!/Sokol GJONI





Lajmet e fundit nga