Ministrat kot të Edi Ramës/Cilët janë anëtarët e kabinetit që po “harrohen” se mbajnë poste

28 Korrik 2016, 15:39, Aktualitet CNA

Pothuajse çdo kabinet qeveritar ka pasur poste apo ministra që vegjetonin, ose thjesht ishin emëruar në një pozicion dhe nuk mbahen mend për gjë. Kësaj nuk i ka shpëtuar as Qeveria Rama, megjithëse në kabinetin e tij ministrat që vegjetojnë nuk janë pak, por 5 të tillë.

Poste të cilat në krizën aktuale që kalon vendi, kur Qeveria nuk ka fuqi të indeksojë më shumë se 1.6 % pensionet, mund t?i kursesnin buxhetit të shtetit, minimalisht pagat e atyre që sot ulen në karriget e Qeverisë. Fare mirë kompetencat e këtyre ministrave mund t?i jepeshin dikastereve të tjera, apo edhe ministrave të tjerë, pasi në realitet kompetencat e tyre ato po i ushtrojnë.

Por le ti marrim me rradhë ministrat që hiq muajt e parë të qeverisë, në pjesën tjetër të 3 viteve të mandatit të parë, nuk dihet se çfarë bëjnë?

Bledi Çuçi mban postin e ministrit për Çështjet Vendore. Me përjashtim të disa tryezave ku u shfaq në debatin për reformën territorial, megjithëse e gjithë reforma u drejtua nga Komisioni i Posaçëm parlamentar, në pjesën tjetër të 3 viteve, qëndron në hije. Hera herës shfaqet në krah të Ramës, si për të treguar apo për të shtuar bindjen se është ai që e mban në post. Në parlament është quajtur si burri i ish-gruas së Edi Ramës, duke u aluduar se kjo është arsyeja sepse sot është Ministër.

Ermonela Felaj, mban detyrën e ministres së Shtetit për Marrëdhëniet me Parlamentin. Zëvendësoi në këtë detyrë Ilirjan Celibashin. Në një vend si Shqipëria ku dihet sesi rregullohen raportet mes institucioneve, posti i Felajt është i tepërt, për më shumë kur mendon se edhe në çështjen e fundit, atë të reformës në drejtësi, u shpërfill qoftë nga Kryeministri, qoftë nga Kryetari i Kuvendit.

Milena Harito, mban detyrën e ministres së Inovacionit dhe Administratës Publike. Në Kuvend cilësohet si kushërira e Kryeministrit. Nuk mbahet mend hera e fundit që ka organizuar ndonjë konferencë, apo qoftë edhe kur ka folur në Kuvend mbi institucionin që mbulon.

Eglantina Gjermeni, mban postin e ministres së Zhvillimit Urban. Dikur kishte nën varësi edhe Turizmin, por kjo fushë tashmë menazhohet nga Ministria e Ekonomisë. Hera herës shfaqet në atë që quhet Rilindja Urbane, dhe që janë projekte që aplikohen nga bashkitë që drejtohen nga të zgjedhur të Partisë Socialiste. Në raste të tjera shfaqet duke folur për banesat sociale, të cilat sërisht menaxhohen nga pushteti vendor. Është nga ministret që pothuajse nuk i ka rënë në sy as opozitës në akuzat që bën vazhdimisht kundër Qeverisë.

Mirela Kumbaro mban postin e ministres së Kulturës. Mund të mbahet mend për kalatë dhe zonat pranë tyre që janë dhënë me konçension, ndërkohë që detyra e saj kryesore është mbrojtja e tyre. Kaq mjafton për të thënë se ka dështuar plotësisht në postin e saj.

Por pavarësisht qëndrimit në hije, hera herës duke i shpëtuar edhe akuzave së opozitës, e cila duket se nuk i ka fare në vëmendjen e saj, këta ministra në jo pak raste kanë qenë objekt akuzash nga vetë kolegët e tyre socialistë.

Ndoshta për këtë kategori, ka kuptim shprehet ?qingji urtë, pi dy nëna?, ose ?urtë e butë, e tigani plot?. /citynews/