E fundit!

14:34 Aktualitet

Kërcënim për sigurinë kombëtare/ Ikballe Berisha shpallet “non grata” në Shqipëri

Ministri i Brendshëm Besfort Lamallari ka nxjerrë urdhrin ...

A po e cënon ambasadori i SHBA-së sovranitetin e Shqipërisë?!/Nga Marash Logu

10 Korrik 2016, 10:14, Blog CNA

A po e cënon ambasadori i ShBA-së sovranitetin e Shqipërisë?! Ka pasur kohët e fundit një debat herë me zë e herë të heshtur nëse insistimi me kaq forcë i ambasadorit amerikan zotit Lu, për reformën në drejtësi ka kaluar kufinjtë e marrëdhënieve diplomatike ndërmjet dy vendeve.

Në fakt si shqiptar, besoj se jo vetëm unë, nuk ndjehem edhe aq mirë kur shoh se si një ambasador i huaj, qoftë ky edhe një populli kurdoherë mik, përzihet kaq hapur në ato që në një demokraci normale konsiderohen si punët e brendshme të një shteti. Por, “çuditërisht” ndërhyrja e kësaj rradhe as nuk më shqetëson si qytetar i Shqipërisë. Përkundrazi.

Jam thuajse i gatshëm të shkoj para derës së ambasadës amerikane e të bërtas me zë “të lutem, zoti ambasador ndërhy Ti, sepse këta politikanët tanë as që e kanë ndërmend të bëjnë diçka të mirë për këtë vend”. Për t’iu përgjigjur modestisht atyre që mendojnë se na shkelet sovraniteti, pavarësia, nderi, integriteti, morali etj., duhet t’iu them që nuk është faji i ambasadorit. Aspak.

Ai po kryen detyrën, i udhëzuar nga Departamenti i Shtetit Amerikan, plotësisht në përputhje me interesat e vendit të tij që për momentin konvenojnë edhe me interesat e kombit tonë. Zoti Lu nuk e ka fshehur. Në një letër drejtuar deputetëve shprehet tekstualisht se është në interesin kombëtar të ShBA që Shqipëria si aleate dhe vend i NATO-s të ketë një demokraci funksionale.

E pra, ambasadori po i shërben me korrektësi këtyre interesave, që janë njëkohësisht edhe interesat e qytetarëve shqiptarë. Prandaj, e quaj ose të pandershme ose hipokrite, nëse e them me fjalë të buta, naive faktin që disave po ju bën përshtypje të madhe ndërhyrja e Donald Lu.

Do kisha një sugjerim për punën në vazhdim të perëndimorëve, duke supozuar gjithmonë se duan veçse të mirën. Nëse realisht duan që ky shtet i vjetëruar, jo në moshë, por për nga mendësia me të cilën është drejtuar prej shumë vjetësh, të zhvillohet e të ecë krah vendeve europiane, ambasadorët apo ndërkombëtarët duhet të punojnë në dy korsi.

Së pari, ajo që po bëjnë, bashkëpunimi me institucionet e përfaqësuesit e tyre për të arritur produktin final. Së dyti, që nuk i kemi parë fare ta bëjnë, të mbështesin forcimin e medias së lirë dhe shoqërisë civile. Jam i sigurt se po të kishim një zë të fuqishëm qytetar, puna për reformën në drejtësi do të kishte ecur shumë më shpejt.

Po të ish’ nga njëra anë presioni ndërkombëtar, mediat e lira dhe shoqëria civile që bashkëpunojnë për të njëjtin qëllim, politikanët tanë tashmë nuk do të kishin tjetër rrugëzgjidhje veçse t’i jepnin vendit reformën aq shumë të dëshiruar në drejtësi.