HABERET E MITROS/ HABERI SI PUNA E VERËS?!

4 Korrik 2016, 10:58, Aktualitet CNA

Apendiks. Mbase ja fut si kau pelës. Ka raste që haberet më duken si puna e verës. Sa më e vjetër, aqë më e kolme! Me këtë filozofi, po botoj një haber të shkruar 17 vjet më parë.
20.7.1999. Këto ditë bleva një kompjuter. I ka të gjitha veglat. Një e ka për e-mail. Për të vajtur haku tek i zoti, këtë vegël e kemi peshqesh nga socialistët. Sa ishte kryeministri me mustaqe (Meksi 1992-1997), për të punuar me e-mail, duhet të putheshe me Milon… Erdhi kryeministri me mjekër (Nano) dhe u bëmë si bota: Me e-mail!
Në mëngjes hapa kompjuterin. Një mesazh për mua. Ma dërgonte kryeministri Majko!… Pashë tekstin! Mallkova veten. E kam sulmuar Majkon me pa të drejtë! Më vrau ndërgjegjia! Unë me gurë, ai me bukë (e-mail)! Le të lexojmë haberin e qeverisë!
E-mail për: Daan Everts (OSBE), Mariza Lino, ambasadore e amerikës. Kandesy ( FMN), Dini ( ministër I Jashtëm I Italisë), Simitis ( kryeministër I Greqisë), Shtëpinë e Bardhë, Pallatin e Strasburgut…
Të nderuar zotërinj! Bëmë mbledhje qeverie. Morëm në shqyrtim mesazhet që na vijnë nga Evropa. Po citojmë njërin: ?Sot në orën 5. Në Patra të Greqisë. Anija “Pama” u ngarkua me cigare “Marlboro”. Ka marrë kursin drejt brigjeve të Shqipërisë. Bën kontrabandë. Kapeni. Pastaj bisedojmë!? Për të qenë të hapur, po u nisim edhe protokollin e mbledhjes së qeverisë.
Kryeministri Majko:- Për këtë problem dua të shprehen të gjithë ministrat. Në radhë të parë, ministri i Rendit. Pastaj i Mbrojtjes.
Petro Koçi ( ministër i Rendit):- Zoti Kryeministër! Këto mesazhe janë objekt për teatër. Në qoftë se biem dakord, po i them regjizorit Kiço Londo të bëjë një komedi! Lexoni tekstin! Thotë emrin e anijes. Qytetin ku ngarkohet. Kursin e udhëtimit…Unë pyes: Pse nuk e kapin vetë! Mos u mungojnë mjetet? Mazalla! Informacionet? I kanë me bollëk. Krundet na i dërgojnë edhe neve!
Kryeministri: – Zoti ministër i Mbrojtjes! A mund t’i qëllojmë me top anijet kontrabandë?
Luan Hajdaraga: – Topa kemi. Topa s’kemi. Obuzët janë të epokës kur e kishim grurë me Bashkimin Sovjetik. Kemi edhe ca nga të Mao Ce Dunit. Armatimet që na ka dhënë amerikani nuk i përdorim pa komandë. Ne kemi armën. Ata këmbëzën!…
Ikën dritat. Erdhën dritat. E-mail ishte fshirë! Më mbeti gozhdë. Nuk pata mundësi të lexoja vendimin e qeverisë…