Ulet papunësia/ Në tremujorin e parë 2016 arrin 16.6 %

13 Qershor 2016, 17:47, Aktualitet CNA

Në tremujorin e parë të vitit 2016, sipas Anketës së Forcave të Punës, individët që janë aktivë në tregun e punës përbëjnë 65,9 % të saj, ndërsa ata ekonomikisht jo aktivë janë 34,1 % të popullsisë. Në tremujorin e parë 2016, shkalla e papunësisë është 16,6 %, duke shënuar një ulje prej 0,74 pikë përqindje nga tremujori i katërt i vitit 2015. INSTAT tregon se punësimi shfaq një tendencë rritjeje si në terma vjetorë ashtu dhe në terma tremujorë. Në terma vjetorë, punësimi u rrit me 5,2 %, ndërsa krahasuar me tremujorin e katërt të vitit 2015, punësimi u rrit me 2,1 %?

Punësimi

Në tremujorin e parë të vitit 2016, shkalla e pjesëmarrjes në forcat e punës për popullsinë 15-64 vjeç është 65,9 %. Për femrat shkalla e pjesëmarrjes në forcat e punës është 58,2 % ndërsa për meshkujt 73,4 %. Për femrat shkalla e pjesëmarrjes në forcat e punës u rrit me 1,4 pikë përqindje krahasuar me tremujorin pararendës. Gjatë tremujorit të parë të vitit 2016, shkalla e pjesëmarrjes në forcat e punës për të rinjtë e moshës 15-29 vjeç është 46,2 %. Shkalla e punësimit së të rinjve është 32,1 %. Shkalla e pjesëmarrjes në forcat e punës për popullsinë 30-64 vjeç është 75,4 %. Shkalla e punësimit për këtë grup-moshë është 65,7 %.

Gjatë tremujorit të parë 2016, 39,5 % e të punësuarve të moshës 15-64 vjeç janë të angazhuar në sektorin e bujqësisë dhe 24,2 % e të punësuarve punojnë në sektorin e shërbimeve të tregut (tregtia me shumicë dhe pakicë; riparimi i automobilave; hotelet dhe restorantet; transportet, magazinimi dhe komunikacioni; ndërmjetësimi monetar dhe financiar; pasuritë e patundshme). Punësimi në sektorin e shërbimeve jo të tregut (administrimi publik dhe i mbrojtjes; sigurimi shoqëror i detyruar; arsimi; shëndetësia dhe veprimtari të tjera sociale; aktivitete të tjera të shërbimit kolektiv; social dhe individual; shërbime në shtëpi; aktivitete të organizmave ndërkombëtare) përbën 16,6 % të punësimit total të grup-moshës 15-64 vjeç. Të punësuarit në industrinë përpunuese përbëjnë 9,8 % së të punësuarve 15-64 vjeç.

Krahasuar me tremujorin pararendës, punësimi gjithsej u rrit me 2,1 %. Ritmi i rritjes së punësimit sipas sektorëve kryesorë të ekonomisë nga tremujori i katërt 2015 në tremujorin e parë 2016 është: 3,6 % në sektorin e bujqësisë; 2,1 % në sektorin e shërbimeve. Ndërsa në sektorin e industrisë ka një rënie të lehtë të numrit të të punësuarve prej 0,1 %. Në terma vjetorë, punësimi për popullsinë 15 vjet e lart u rrit me 15,5 % në sektorin e industrisë (industri nxjerrëse, industri përpunuese, ndërtim dhe industri të tjera); me 6 % në sektorin e shërbimeve dhe me 0,7 % në sektorin e bujqësisë.

Gjatë tremujorit të parë të vitit 2016, në grup-moshën 15-64 vjeç, pesha që zënë në punësimin total të punësuarit me pagë është 41,3 %. Të vetë-punësuarit (punëdhënës ose të vetë-punësuar pa të punësuar të tjerë me pagë) përbëjnë 33,5 % të të punësuarve në tërësi, ndërsa punëtorët pa pagesë të familjes përbëjnë 25,2 % të punësimit total.

Shkalla e punësimit (grup-mosha 15-64 vjeç) është më e lartë për të punësuarit me arsim të lartë (64,4 %) dhe ata me arsim profesional (63 %). Po të analizojmë të punësuarit me arsim të mesëm, shkalla e punësimit është më e lartë për personat me arsim të mesëm profesional me 63 %, kjo krahasuar me personat që kanë kryer shkollën e mesme të përgjithshme me 52,3 %. Pesha që zënë të punësuarit me pagë rritet me rritjen e nivelit arsimor. Nga të punësuarit me arsim të lartë 85,3 % janë të punësuar me pagë dhe vetëm 3,1 % janë të punësuar si punëtorë pa pagesë të familjes. Tek të punësuarit me arsim të mesëm profesional përqindja që zënë të punësuarit me pagë është 42,8 % ndërsa tek të punësuarit me arsim të mesëm të përgjithshëm përqindja që zënë të punësuarit me pagë është 48,7 %.

Papunësia

Shkalla e papunësisë për popullsinë 15-74 vjeç është 16,6 %. Krahasuar me tremujorin e pararendës, shkalla e papunësisë ka pësuar një rënie prej 0,3 pikë përqindje. Krahasuar me tremujorin e parë të vitit 2015, shkalla e papunësisë në tremujorin e parë 2016 u ul me 0,7 pikë përqindje. Për popullsinë e moshës 15-64 vjeç shkalla e papunësisë në tremujorin e parë 2016 është 16,9 %. Për meshkujt e kësaj grup-moshë, shkalla e papunësisë është 17,8 % dhe për femrat 15,8 %. Krahasuar me tremujorin pararendës, në tremujorin e parë 2016, pati një rënie me 1 pikë përqindje të shkallës së papunësisë për femrat e moshës 15-64 vjeç.

Gjatë tremujorit të parë 2016 për të rinjtë e moshës 15-29 vjeç shkalla e papunësisë është 30,4 %. Shkalla e papunësisë për të rinjtë ka pësuar një rënie prej 1,7 pikë përqindje krahasuar me tremujorin pararendës. Edhe në terma vjetorë shkalla e papunësisë së të rinjve shfaq tendencë në rënie. Kështu krahasuar me tremujorin e parë të vitit 2015, shkalla e papunësisë për të rinjtë në tremujorin e parë të vitit 2016 ka rënë me 3,7 pikë përqindje. Për popullsinë 30-64 vjeç në tremujorin e parë 2015 shkalla e papunësisë është 12,9 %. Krahasuar me tremujorin pararendës pati një rënie të lehtë me 0,2 pikë përqindje, ndërsa në terma vjetorë ka një rritje prej 0,9 pikë përqindje.

Popullsia ekonomikisht jo-aktive

Gjatë tremujorit të parë 2016, popullsia e moshës 15-64 vjeç ekonomikisht jo aktive përbën 34,1 % të popullsisë së kësaj grup-moshe. 17,2 % e popullsisë ekonomikisht jo aktive e moshës 15-64 vjeç është duke përmbushur detyrat shtëpiake. Nga ATFP rezulton se 13 % e popullsisë ekonomikisht jo-aktive e moshës 15-64 vjeç janë në pension ose pension të parakohshëm, ndërsa 10,4 % janë në paaftësi të përhershme. Një në dhjetë persona të moshës 15-64 vjeç të klasifikuar si ekonomikisht jo-aktivë janë të papunë të dekurajuar. Të rinjtë e moshës 15-29 vjeç që deklaruan se janë nxënës/studentë ose në trajnim përbëjnë 72,9 % të të rinjve ekonomikisht jo aktivë. Ndër të rinjtë e moshës 15-29 vjeç ekonomikisht jo aktivë, 6,9% klasifikohen si të papunë të dekurajuar (nga 9,1 % që ishte në tremujorin e katërt të vitit 2015). Në popullsinë e moshës 30-64 vjeç ky grup përbën 15,2 % të popullsisë ekonomikisht jo aktive të kësaj grup-moshe./Monitor