Përplasjet në mazhorancë/ Shqipëria drejt zgjedhjeve të parakohshme

13 Qershor 2016, 15:12, Aktualitet CNA

Beteja Rama-Meta duket se po e çon çdo ditë e më shumë Shqipërinë në prag të zgjedhjeve të parakohshme. Kjo jo për shkak të largimit të Ilir Metës nga qeveria, po për shkak të pozicioneve të ndara që kanë palët në lidhje me Reformën në Drejtësi. Partia Demokratike ka kërkuar shpesh që të jetë ajo flamurtarja e Reformës në Drejtësi duke filluar nga strukturimi i institucioneve, reformat me 2/3 duke përfunduar tek ?vendet e rezervuara?. Takimi Rama-Basha nuk dha asnjë zgjidhje në finale, po në fund PD doli me pozicionin e saj.

Nga ana tjetër Ilir Meta dikur ishte në pozicionin e tij se LSI-ja do të çonte draftin e saj për Reformën në Drejësi dhe gjithashtu kërkonte që ajo të miratohej sipas raportit që do vinte nga Venecia. Më pas LSI-ja u tërhoq nga ai raport dhe shkoi tek kushti se Reforma në Drejtësi duhet të bëhej vetëm e vetëm me opozitën. Por në një qëndrim të tretë publik të LSI-së u duk qartaz se Meta dhe partia e tij po shkonin drejt Edi Ramës me një pazar për Reformën në Drejtësi. Pazar të cilin mesa duket ditët e fundit Kreu i Kuvendit e ka braktisur dhe pas takimit Meta-Basha dje, sot LSI-ja është me një qëndrim tjetër: është rikthyer tek Reforma në Drejtësi me opozitën.

LSI-ja po afrohet gjithnjë e më shumë me opozitën. Nga ana tjetër kreu i qeverisë duket se nuk heq dorë nga formatimi i institucioneve, por edhe moslëshimet e mëtejshme ndaj PD-së, çka bën që kreu i qeverisë dhe kreu i kuvendit të vijojnë të thellojnë përplasjet e tyre që duken se po çojnë vendin drejt zgjedhjeve të parakohshme, të cilat sipas vetë Kreut të qeverisë Edi Rama, në rast se nuk kalohet Reforma në Drejtësi, janë të pashmangshme.

Vetë Kryeministri i vendit, Edi Rama ka deklaruar më parë se Reforma në Drejtësi është thelbi dhe maja e reformave në Shqipëri. Rrëzimi i saj do të çonte në zgjedhje, sepse planet e tij, qoftë ai A, B apo C po bien një e nga një. Ilir Meta kërkon opozitën dhe vetëm opozitën. Opozita duket qartazi se ka vendosur kritere të paplotësueshme nga Rama, që në shumë mënyrë të çojnë në mendimin se zgjedhjet e parakohshme janë të pashmangshme si shkak i mosaprovimit të Reformës në Drejtësi, e cila është molla e sherrit në mazhorancë.

Lëvizjet në skenën politike shqiptare janë të shpejta dhe ende ka shumë tym por zgjedhjet e parakohshme janë të pashmangshme dhe Rama i ka ato si alternativë duke patur përballë një opozitë të papërgatitur mbi reformën zgjedhore të papërfunduar./citynews