Ekskluzive/ Saimir Tahiri nuk donte arrestimin e Emiljano Shullazit. Ja si e futi në kurth prokuroria

17 Prill 2016, 14:08, Aktualitet CNA

Arrestimi i Emiljano Shullazit ishte një lajm që tërhoqi vëmendjen e opinionit publik në vend. Në fakt arrestimi i tij nuk u krye nga policia, por nga prokuroria, e cila arriti të fus në kurth Shullazin dhe policinë.

Burime nga Prokuroria e Përgjithshme thanë për citynews se Emiljano Shullazi u arrestua nga Krimet e Rënda përmes një loje të prokurorisë. Kjo e fundit i kërkoi policisë të thërriste Shullazin në Drejtori për të sqaruar akuzat e ngritura nga ish-kryeminsitri Sali Berisha.

Të njejtat burime theksuan se Shullazi shkoi në polici duke menduar se do të merrej në pyetje për denoncimin e Sali Berishës. Pasi u shoqërua në polici, i është komunikuar fletë-arresti për vepra të tjera penale ku Shullazi ishte i dyshuari kryesor. Në këtë mënyrë Shullazi nuk do mund të lirohej dhe Saimir Tahiri nuk mund të bënte asnjë lëvizje, edhe pse mund të kishte menduar se cdo gjë do mbyllej me një dëshmi për denoncimin e Berishës, pasi nuk do kishte prova për ta arrestuar.

Në fakt, Saimiri Tahiri dhe policia nuk vërtetojnë në asnjë rast se kanë dashur të arrestojnë Emiljano Shullazin. Ka qenë strategjia e prokurorisë, e cila ka përfituar nga denoncimi i Berishës për ti kërkuar policisë të thërrasë Shullazin të dëshmojë për rastin në fjalë.

Policia dhe vetë Shullazi kanë rënë në grackën e prokurorisë, e cila kishte përgatitur fletë-arrestin për vepra të tjera penale dhe jo për kërcënimin e kandidatit për Rektor në Universitetin e Tirënës, Mynyr Koni.

Ky fakt është pasqyruar sot edhe nga Policia e Tiranës, e cila përmes një deklarate për mediat thotë se Shullazi është arrestuar si i dyshuar për veprën penale të ?gjobëvënies? si dhe për vendosjen e lëndës eksplozive në pronën e një shtetasi.

Emiljano Shullazi është denoncuar disa herë nga ish-kryeministri Sali Berisha për lidhjet e tij me kryeministrin Edi Rama dhe ministrin Saimir Tahiri. Në mjaft raste ai shoqëruar në polici dhe ka arritur të dalë i palagur për mungesë provash, por këtë radhë prokuroria ka arritur të fusë në kurth Shullazin, policinë dhe vetë ministrin Saimir Tahiri./citynews