Letër dërguar Presidentit Obama, e cila i paraprin vizitës së Ramës në SHBA

6 Prill 2016, 14:30, Blog CNA

Nga Kryetari i Organizatës ?REAGO? Leonard DEDEJ.

I nderuar Z. President i Sheteve të Bashkuara të Amerikës,
President i botës së lirë dhe të civilizuar, dhe Presidenti i vendit i cili mban peshën më të madhe mbi supe për garantimin e vetë ekzistencës së njerëzimit.
Në vitin tragjik 2001, unë isha rezident në Londër, dhe u trondita së tepërmi kur pashë sulmet terroriste të 11 Shtatorit në tokën Amerikane. Në vitin 2003 unë udhëtova drejt SHBA për tu bashkuar me trupat ushtarake të SHBA të vendosura në Irak në atë periudhë. Ky vendim për të luftuar përkrah forcave të SHBA ishte një nga mënyrat e mia për të falënderuar SHBA-të për atë që ka bërë gjithnjë dhe bëjnë në mbështetje të vendit tim.
Meqënëse SHBA, ka qenë, është, dhe do të jetë gjithnjë vendi i cili mbështet fort popullin Shqiptar, dua tju sjell në vëmendje me këtë rast veprën e lartë sublime të Z. Woodrow Wilson para njëqind vitesh, duke shpëtuar popullin Shqiptar nga zhdukja dhe shfarosja. Dhe është falë këtij akti të tijin që ne si Komb akoma ekzitojmë. Unë personalisht besoj se lidhja ndërmjet dy vendeve tona është e fortë dhe sidomos përsa i përket lirisë, dhe dëshirës së mirë, dhe sigurisht rolit thelbësor të vendit tuaj i cili ka mbrojtur dhe mbron gjithnjë vendet e vogla nga tirania dhe padrejtësitë.
Por sot Shqipëria është edhe njëherë sërish shumë pranë zhdukjes, kësaj rradhe nga politikanët tanë të cilët kanë marë peng sistemin tonë politik në Shqipëri duke i kthyer partitë politike në prona private. Ne sot udhëhiqemi nga një klasë politike që është totalisht e korruptuar, pa vizion për të ardhmen dhe mirqënien e popullit të tyre, por ata punojnë vetëm për interesat e xhepit të vet duke bërë pasuri në kurriz të varfërisë, vuajtjeve dhe dëshpërimit të popullit te vet.
Politikanët tanë të sotshëm sjanë asgjë tjetër vecse mbetje toksike të lëna pas nga sistemi i tyre paraardhës diktatorial komunist.
I nderuar zotëri, me anë të kësaj letre ju bëj apel si President i SHBA për të mbështetur popullin Shqiptar dhe jo partitë politike të cilat kanë shkatërruar Kombin dhe po shkatërrojnë jetët tona. Ne sot në Shqipëri kemi nevojë për një revolucion të vërtetë dhe kjo po duket shumë e vështirë për tu bërë e mundur në rrugë paqësore.
Smund të bëni aleancë me këtë klasë politike e cila cënon rëndë interesat kombëtare dhe ato të popullit Shqiptar.
Amerika ka nevojë për një Komb të fortë Shqiptar, të fortë ekonomikisht dhe demokratikisht dhe këtë kurrsësi nuk mund ta garantojë qeveria aktuale e cila grabit qytetarët e vet, i con ata drejt skamjes dhe varfërisë ekstreme, shkel të drejtat e njeriut duke i varrosur njëherë e përgjithmonë shpresat për një komb të shëndetshëm.

Leonard Dedej