PROFILI/ Një CV e shkurtër e Arben Ahmetajt, ministri i ri i Financave

16 Shkurt 2016, 11:30, Politikë CNA

Po kush është ministri i ri i Financave?

Ai ka kryer disa specializime ndërkombëtare. Ka kryer në vitin 1996, Master për Tregti Ndërkombëtare dhe Diplomaci në Patterson, Universiteti i Kentucky, SHBA.

Arben Ahmetaj është ndër ministrat që ka marr vlerësimet më pozitive në raportet ndërkombëtare. Agjencia prestigjioze e vlerësimit me bazë në Shtetet e Bashkuara të Amerikës ?Standard & Poor?s? vetëm pak ditë deklaroi se ekonomia e Shqipërisë kalon nga e qëndrueshme, në pozitive.

Vetë Ahmetaj e vlerësoi këtë si një tregues të reformave të ndërmarra nga qeveria shqiptare.

Arben Ahmetaj, ka lindur në qytetin e Gjirokastrës më 28 Qershor 1969. Ai është i martuar me znj. Albina Mançka, dhe ka dy vajza, Livia dhe Kejsi.

Eshtë Anëtar i Grupit Parlamentar të Partisë Socialiste dhe deputet në Kuvendin e Shqipërisë tashmë prej dy legjislaturash. Në mandatin e parë përfaqësoi qarkun e Korçës ndërsa në zgjedhjet e 23 Qershorit 2013 u zgjodh deputet i Qarkut të Gjirokastrës.

Në karrierën e tij z. Ahmetaj ka mbajtur funksione të rëndësishme si Zv. Ministër në Ministrinë e Integrimit Europian (2004-2005) dhe Zv. Ministër në Ministrinë e Energjisë dhe Industrisë (2003-2004).

Ka kryer funksionin e Drejtorit të Përgjithshëm në Drejtorinë e Përgjithshme të Tatimeve të Shqipërisë dhe ka qenë përgjegjës për hartimin e politikave dhe legjislacionit të ri fiskal (Kodi Fiskal, Akcizat dhe legjislacioni i ri për taksën direkte).

Ka qenë përfaqësues i Qeverisë Shqiptare në procesin e negociatave me Bashkimin Europian lidhur me Marrëveshjen e Stabilizm Asociimit dhe Kryetar i Grupit Negociator me Komisionin Europian për Komunitetin e Energjisë. Në vitet 1992-1993, ka kryer funksionin e Këshilltarit të Ministrit të Financave si dhe Asistent i Thesarit të SHBA.

Z.Ahmetaj ka kryer studimet për Doktoraturë në Universitetin e Bukureshtit, Rumani, gjatë viteve 2005-2009 dhe që nga viti 2009 mban titullin Doktor i Shkencave në fushën e Sigurisë Energjitike.

Ka kryer Studimet Master në Universitetin e Kentucky-t, SHBA, për Tregti Ndërkombëtare dhe Diplomaci, diplomuar në vitin 1996.

Ka kryer projekte kërkimore për Financë Ndërkombëtare dhe Tregje Financiare Ndërkombëtare në Universitetin e Harvardit, SHBA (1999- 2000); Për Menaxhimin e Politikave Ekonomike Publike, në departamentin e Ekonomisë, në Universitetin George Washington, Edmund Walsh School of Foreign Service, Washington, SHBA, si dhe për Menaxhimin e Konflikteve në Epokën e Teknologjisë së Informacionit, Athinë (2004)

Ai është autor i disa publikimeve shkencore.

Zotëron shumë mirë gjuhët angleze, italiane, greke dhe është njohës i gjuhës ruse.