E fundit!

20:13 Aktualitet

Vendimi i qeverisë/ Shqipëria hap ambasadë në këtë vend të BE-së

Shqipëria do të hapë ambasadën e saj në Irlandë. Vendimi ë...

Adriatik Llalla, një pengesë që provon domosdoshmërinë e “tërmetit” në Prokurori

25 Janar 2016, 16:34, Aktualitet CNA

Lajmi i sotshëm është se Adriatik Llalla, që ushtron detyrën e Prokurorit të Përgjithshëm, ka rezerva për draftin e propozuar në kuadër të reformës në Drejtësi. Llalla ndodhet në Kroaci, ku duket se ka bërë disa vlerësime për ndërhyrjen që bëhet në organin e akuzës, të cilat nuk i pëlqejnë. ?Siç theksohet në njoftimin për shtyp të Prokurorisë së Përgjithshme, paketa kushtetuese parashikon një këshill me një shumicë të brishtë prokurorësh, që do të drejtohet nga një person jashtë sistemit; e për këtë arsye Adriatik Llalla ka rezerva për draftin. Sipas Llallës modeli i duhur do të ishte ai kroat, ku Këshilli i Prokurorisë ka 11 anëtarë, 7 prej të cilëve janë prokurorë dhe drejtuesi është po ashtu prokuror. Edhe për strukturën anti-korrupsion Llalla është kundër parashikimeve të bëra nga ekspertët shqiptarë. Ai gjykon se duhet zgjedhur modeli kroat dhe struktura të jetë në varësi të prokurorit të Përgjithshëm e jo një institucion i pavarur?( http://vizionplus.al/llalla-rezerva-per-reformen/).

Nuk mund të aludohet për asnjë çast për arsyen se përse rezervat e Llallës përputhen me ato të Lëvizjes Socialiste për Integrim, por një gjykim mbi pretendimet e kreut të organit të akuzës është legjitim. Llalla po kërkon që të ruhet status quoja e drejtimit të Prokurorisë, qoftë edhe për strukturën antikorrupsion, të cilën para disa kohësh e shpalli të tepërt dhe pa ngarkesë pune. Llalla kërkon ruajtjen e kontrollit mbi një njësi të tillë, ndërkohë që edhe për një çështje të hapur vetë, siç është nisja e hetimit kryesisht për konçesionet e Ministrisë së Shëndetësisë, u desh një muaj për të caktuar prokurorin.

Adriatik Llalla sugjeron që Këshilli i Prokurorisë të jetë nën kontrollin e një mazhorance prokurorësh, duke ardhur në kundërshtim me frymën e amendimeve si dhe me kërkesat që shtrohen pas një përvoje jo të mirë me Prokurorinë. Deri më tani, ky organ ka qenë i centralizuar dhe Adriatik Llalla me parardhësit e tij kanë qenë të plotfuqishëm për të vepruar. Nuk e kanë bërë këtë gjë, megjithë tagrin dhe pushtetin real që kanë patur. Llalla vetë është një Prokuror që është dëgjuar shpesh të thotë se ?do të ketë arrestime të bujshme?, e megjithatë asgjë nuk ka ndodhur. Sikur edhe kjo përvojë e vogël të gjykohet, lind si kërkesë minimale largimi i këtij individi nga drejtimi i Prokurorisë për paaftësi. Ka edhe arsye të tjera. Është fakt i njohur tashmë e nuk përbën ndonjë akuzë të thuhet se Prokurori i Përgjithshëm është violinë e Ilir Metës dhe PD-së, në këtë përballje të madhe që po ndodh për reformën në Drejtësi. Komikja është se kur drejtues institucionesh marrin përsipër të përçojnë lojëra politike duke harruar funksionet reale, ndodh që sapo politika arrin konsensus-pazarin, edhe falë tyre, e ka shumë kollaj që mandej t?i flakë si limona të shtrydhur. Shembujt janë të shumtë. Sido që ta shikosh Llalla nuk i duhet Shqipërisë: një vend i zhytur në korrupsion, me akuza publike për vrasje në mes të Parlamentit dhe përfundimi: asgjë nuk ka ndodhur. Dhe mbulimi me heshtje është edhe përgjegjësi e Prokurorisë, e individit që e drejton, e modelit që është adoptuar. Ndaj ikja e Lllallës dhe ndryshimi i modelit duhen përshëndetur, jo pse naivisht beson njeri se do të ndodhë revolucioni, por si një mundësi e vetme për të shkundur dhe zhbërë një ekuilibër që i shërben vetëm dy apo tri njerëzve./Respublica