Profesionet e lira, 5 mijë persona do paguajnë 9.5 mln USD më shumë

25 Nëntor 2015, 18:30, Ekonomi CNA

Nisma e qeverisë që detyron profesionet e lira të paguajnë kontributet për sigurimet shoqërore mbi bazën e pagës maksimale (97.030 lekë) do të përfshijë rreth 5 mijë përsona që ushtrojnë profesionin e avokatit, përmbaruesit, inxhinierit, dentistit, doktorit, përkthyesit, noterit, vlerësuesit, etj.

Sipas propozimit të Ministrisë së Financave, i cili është prezantuar për diskutim në Kuvend në kuadër të Paketës Fiskale 2016, nga kjo masë pritet të arkëtohen vitin që vjen rreth 1.1 miliardë lekë më shumë ose 9.5 milionë dollarë.

Por sakaq nisma e qeverisë ka ngjallur pakenaqësi në grupet e interesit, pasi pagesa e projektuar e kontributeve për një sërë profesionesh të lira nuk i korrespondon të ardhurave reale nga paga.

Burimet nga Instituti i Sigurimeve Shoqërore pohuan, se masa aktuale e kontributeve që paguajnë profesionet e lira është e ulët, porse ende nuk ka një projektligj për rritjen e tyre dhe specifikimin e saktë për kategoritë që do të aplikohet rritja.

Të ardhurat nga kontributet e sigurimeve shoqërore dhe shëndetësore gjatë vitit që vjen vlerësohen në masën rreth 79 miliard lekë, ose 12,7% më shumë në krahasim me pritshmërinë për vitin 2015 ose 8,9 miliard lekë më shumë.

Lufta ndaj informalitetit, e cila ka nisur në shtator, ka rritur bazën e tatueshme e kontribuesve në skemë me mbi 70 mijë të rinj. Referuar të dhënave të administratës tatimore, sipas të cilave janë mbi 30 mijë biznese në skemë, në llogaritjen e të ardhurave shtesë janë llogaritur që kontributet paguhen nga ?të vetpunësuar? janë rreth 30 mijë punonjës dhe pjesa tjetër paguan kontribute si ? i punësuar?.

Llogaritjet e të ardhurave shtesë në buxhetin e shtetit nga kontributetet e të punësuarve të rinj janë bazuar në pagën minimale prej 22 mijë lekë në muaj, për të qënë sa më konservator në parashikim. Për këtë arsye, dhe duke konsideruar që reforma kundër informaliteti do të ketë një ndikimi më konkret në periudhën afatmesme për sa i përket pagesës së kontributeve sipas pagës reale, në vlerësimet e për tatimin mbi të ardhurat personale nuk janë marrë në konsideratë të ardhura shtesë nga punësimet e reja. Gjithashtu 1.1 miliardë të tjera më shumë janë parashikuar të arkëtohen nga ndryshimi bazës së llogaritjes së kontributeve të sigurimeve shoqërore dhe shëndetësore që duhet të paguajnë profesionet e lira, të tilla si avokat; përkthyes, përmbarues; noter, inxhinier, dentist, doktor, vlerësues pasurish./Monitor