Kreditimi në nivelin më të ulët të 3 viteve të fundit/ Bie interesi i bizneseve dhe qytetarëve për hua në banka

10 Nëntor 2015, 08:30, Ekonomi CNA

Shtrëngimi gjithnjë e më shumë i kushteve bankare ka sjellë uljen e interesit të bizneseve dhe qytetarëve për kredi. Shoqata e Bankave publikoi dje të dhënat financiare të paaudituara të bankave tregtare për tremujorin e tretë të vitit 2015 si dhe të dhënat e agreguara mbi sistemin për muajin shtator 2015. Sipas të dhënave nga shoqata e bankave, si bizneset ashtu dhe individët po priren drejt kursimit, teksa totali i depozitave të vendosura pranë bankave arriti në fund të shtatorit në 1,090.3 miliardë lekë, duke vijuar tendencën rritëse si në terma tremujorë ashtu edhe krahasuar me një vit më parë, respektivisht me një rritje prej 1% dhe 3.8%. Bankat pranojnë se në rritje paraqiten si depozitat e individëve edhe ato të bizneseve. ?Në fund të muajit shtator depozitat e individëve janë rreth 17 miliardë lekë më të larta se fundi i vitit 2014, dhe 1% më të larta se niveli i qershorit 2015. Paralelisht, zhvillime pozitive kanë shfaqur edhe depozitat e bizneseve, të cilat në dy vitet e fundit janë shfaqur vazhdimisht me rritje?, thotë Shoqata e Bankave, sipas së cilës, depozitat e bizneseve në fund të shtatorit ishin 10.7% ose 14.9 miliardë lekë më të larta se një vit më parë.

Kreditimi

Shoqata e Bankave pranon kreditimin e dobët për bizneset, ndërsa për qytetarët shprehet se janë pikërisht këta të fundit të painteresuar për huamarrjen bankare. AAB konfirmon se megjithë përpjekjet e bankave për të promovuar kredinë për banesa, qytetarët kanë qenë të prirur gjatë kësaj kohe vetëm drejt huamarrjes për konsum. ?Teprica e kredisë së pashlyer në fund të tremujorit të tretë paraqitet në rënie prej 1%, megjithatë po të konsiderohet efekti i provigjionimit të kredive me probleme portofoli ka mbetur lehtësisht i pandryshuar nga niveli i qershorit. Kjo ecuri e aktivitetit kreditues është ndikuar nga kreditimi i dobët i bizneseve, portofoli i të cilëve gjatë kësaj periudhë ka qenë përgjithësisht në rënie. Kredia për individë vazhdon të shfaqë ritme të qëndrueshme rritjeje vjetore prej 2.5%. Kjo rritje është mbështetur kryesisht tek kreditimi për nevoja për konsum, ndërsa kreditimi për shtëpi edhe pse vijon të promovohet nëpërmjet produkteve bankare, ka konfirmuar një kërkesë të dobët?, bën me dije Shoqata e Bankave. Kredia e re e disbursuar gjatë tremujorit të tretë 2015 ishte në total rreth 55.7 miliardë lekë dhe në pjesën më të madhe (rreth 78 për qind) e dhënë për bizneset. Largimi i bizneseve nga bankat që operojnë në Shqipëri dhe drejtimi tyre në vendet e rajonit për kredi është pranuar dhe nga vetë përfaqësuesit e bizneseve, të cilët janë ankuar edhe publikisht për kushtet e bankave si normat e interesit, komisionet, kërkesat etj.

BSH: Kreditimi, më i ulëti në 3 vite

Sektori bankar mbetet i financuar nga depozitat e klientëve dhe nuk shfaq varësi financimi nga bankat mëma. Të dhënat më të fundit të publikuara nga Banka e Shqipërisë tregojnë se huaja e re për ekonominë në shtator është më e ulëta në të paktën tre vjet, duke treguar qartazi për një stanjacion të huadhënies në vend. Në lekë, huaja e re në shtator ishte 6.1 miliardë lekë, më e ulëta që nga marsi i vitit 2013. Në euro, huaja e re për ekonominë në shtator ishte vetëm 31 milionë euro, duke shënuar nivelin më të ulët që nga marsi 2015. Rënie ka shënuar dhe stoku i huasë, që zbriti me 1.8% me bazë vjetore në 546 miliardë lekë. Në raport me një muaj më parë, rënia e stokut ishte 0.7%, kryesisht si rrjedhojë e tkurrjes së kredisë në valutë.