Bushati në Argjentinë: Forcim të bashkëpunimit ekonomiko-tregtar

3 Nëntor 2015, 09:26, Aktualitet CNA

Kryediplomati shqiptar, Ditmir Bushati zhvilloi një vizitë zyrtare në Argjentinë.

Kjo vizitë që vjen pas 15 vitesh që nga vizita e fundit e një Ministri të Jashtëm shqiptar në këtë vend me lidhje të forta historike, thekson Bushatit, shërben si një shtysë për ripërtëritjen e marrëdhënieve dypalëshe.

?Bashkëpunimit të mirë mes dy vendeve të evidentuara në organizatat ndërkombëtare duhet të reflektohet dhe në fusha të tjera dhe sidomos në bashkëpunimin ekonomiko-tregëtar. Mes dy vendve ka një potencial të lartë për thellimin e bashkëpunimit dypalësh dhe ekziston vullneti për të shfrytëzuar maksimalisht atë?, deklaron ministri.

Në kuadër të kësaj vizite, Bushati pati takime me ministrin e Punëve të Jashtme dhe Kulteve, Hector Marcos Timerman, Zv.presidentin e vendit dhe Presidentin e Senatit, Amado Boudou, me kryetarin e Komisionit të Politikës së Jashtme të Dhomës së Deputetëve të Parlamentit të Argjentines, Guillermo Carmona si dhe me diasporën shqiptare.

?Pata mundësinë e mirë për të diskutuar me autoritet e larta të këtij vendi për disa sfida dhe veçori të perbashkëta që nxisin një bashkepunim më të mirë mes dy rajoneve dhe vendeve tona?, deklaron Bushati.

Në takimin me homologun e tij të Argjentinës, Bushati kërkoi zgjerimin e mëtejshëm të bashkëpunimit ekonomik, veçanërisht në fushën tregtare, energjisë së rinovueshme, bujqësisë dhe turizmit.

Ministri Bushati i kërkoi homologut Timerman që të ndërmarri hapat e nevojshëm që do të mundësonin pjesëmarrjen e Kosovës në organizatat ndërkombëtare.

Dy ministrat vlerësuan rolin e çmuar të diasporës shqiptare në këtë vend si pjesëmarrës aktive në jetën demokratike të Argjentinës si një urë e rëndësishme për institucionalizimin dhe forcimin e marrëdhënieve mes dy vendeve.

Në takimin me Zv.presidentin dhe Presidentin e Senatit, Amado Boudou u vlerësuan marrëdhëniet tradicionale dhe miqësore mes dy popujve, ndërsa kjo vizitë u konsiderua nga palët si një hap i rëndësishëm në drejtim të forcimit të mëtejshëm të marrëdhënieve ndërmjet dy vendeve.

Në takim me kryetarin e Komisionit të Politikës së Jashtme të Dhomës së Deputetëve të Parlamentit të Argjentinës, Guillermo Carmona, u diskutua mbi forcimin e bashkëpunimit dypalësh, intensifikimin e dialogut politik dhe rolin e diplomacisë parlamentare si një instrument i rëndësishëm për bashkëpunimin ne te ardhmen.

Në përmbyllje të vizitës së tij në Argjentinë, Bushati zhvilloi një takim të veçantë me një grup përfaqësuesish të diasporës shqiptare të Argjentinës, si një prej diasporave më të vjetra shqiptare në botë.

Ai përgëzoi për ruajtjen e gjuhës dhe kulturës shqiptare si dhe u dhuroi disa kopje të Abetares shqipe për nevojat e komunitetit për promovimin dhe ruajtjen e gjuhës shqipe në brezat e rinj.

Gjithashtu, ministri i ftoi ata që si një prej diasporave më të vjetra në botë të marrin pjesë në samitin e diasporës që do të zhvillohet në Tiranë në fillim të vitit tjetër.