Në Pogradec humbi Diana Mile/ E mundi QYTETARIA

19 Gusht 2015, 08:25, Aktualitet CNA

Nga Elvi FUNDO

Ka dy ditë që në skenë është rikthyer një kandidate humbëse, pikërisht Diana Mile në Pogradec. Ajo ka akuzuar PS-në dhe ish-kryebashkiakun Artan Shkëmbi si shkaktarë të humbjes së saj.

Por, së pari Diana duhet të thotë që ka fituar kandidati i PD, Eduart Kapri i cili vinte nga e majta, investoi, punoi dhe theu Dianën dhe një kupolë që e mbështeste nga pas. Them nga e majta, dhe për ata që nuk e njohin, z. Kapri ka qenë Kryetar i Këshillit Bashkiak, Pogradec, gjatë kohës që drejtohej nga e majta, si përfaqësues i PSD-së të Skënder Gjinushit.

Më tej mund të themi se Diana Mile nuk është ndonjë personazh i njohur dhe me ndonjë reputacion të madh në qytet apo të ketë aktivitet publik dhe politik. Më shumë ajo njihet si biznesmene, ndërtuese dhe mike e ish-kryetarit të Komunës Roshi Tollozhina. Ky i fundit i ka dhënë asaj mundësi të ndërtojë pallatë në komunën e Bucimasit që kishte nën administrim një nga perlat e zonës të Pogradecit, nga vilat e ish-bllokut në kufi me Maqedoninë.

Prandaj Diana, duhet të jetë e sinqertë në deklarimet e saj dhe jo të kërkojë fajtorë, kur ajo vetë është faji. Jo se po i digjet dikujt barku për një sherr PS-LSI, por nuk mund të tallet me opinionin public dhe në veçanti me qytetarët e Pogradecit, që i dhanë një leksion të mirë asaj dhe atyre që e kandiduan dhe mbështetën.

Të vërtetën po ja themi shkurt. Ajo humbi sepse ishte kandidate e vendosur me zorr dhe qyteti e perceptoi si vartëse të zotit Roshi Tollozhina, me mbështetje dhe reputacion në komunën e tij, por këtë herë e pati të pamundur të imponohej në Pogradec. Kjo edhe për shkak të betejës të rivalit ?demokrat?.

Ndërkohë që LSi dhe Tollozhina kanë 90% të institucioneve në Pogradec. A mund të pranonin qytetarët e Pogradecit që edhe bashkinë ta merte dikush nga Starova? Çdo institucion e kishte LSI, tani merte edhe Bashkinë me një personazh aspak me reputacion, socialistët, demokratët, qyteti ku shkonte? Këtë pyetje e dëgjoje tek të majtë dhe të djathtë.

Roshi Tollozhina nuk u pranua nga kryeministri Rama si kandidaturë dhe më pas ai në bashkëpunim me Ilir Metën vendosën Diana Milen. Ortake dhe bashkëpunëtore e ngushtë e Tollozhinës, kandidaturë e tij krejt personale. Kandidatura e tretë tek Ilir Meta dhe LSI ishte Eduart Kapri. Këtë e ka konfirmuar publikisht vetë kreu i Kuvendit. Kapri nuk priti verdiktin e Metës, duke njohur nga afër konjukturat e LSI-së në Pogradec, por i cuar nga Fahri Balliu edhe tek Lulzim Basha, pranoi që të ishtë kandidaturë e PD-së. Kapri është fitues dhe fituesi nuk gjykohet.

Por duke dhënë të tjera fakte, kthehemi tek Diana Mile që nuk duhet të harojë kaq shpejt. Dhe menjëherë lindin disa pyetje:

Po a bëhet fushatë me qershi, kumblla e dardha për Mokrën? Po ku ishte strategjia për turizmin në Pogradec? A mund të zgjidhet kryetare bashkie dikush që pak muaj më parë ishte përgjegjëse që subjekti i saj bllokoi për orë, ditë e net rrugën nacionalë Qaf-Thanë-Pogradec? A mund të bësonin se Diana Mile, nuk do ishte thejsht notere e kryekomunarit të Bucimasit në Bashkinë e Pogradecit?

Pyetjet, gafat e fushatës, janë pafund dhe këto informacione sot i degjon kudo në Pogradec, fajtori është kandidatura, dhe sjellja e LSI me Pogradecin, kjo rezulton të jetë e verteta aspak e dhimbshme që Diana Mile, Roshi Tollozhina, Pirro Kapurani Ilir Meta, Ilir Xhangolli, Artan Shkëmbi, Niko Peleshi dhe kryeministri Rama së bashku me kreun e opozitës Lulzim Basha e dinë mjaft mirë.

Edhe njëherë pogradecarëve nuk ja shet dot troftën për koran, se janë zanacinj të vjetër, dhe dinë të japin leksione dhe të forta pikërisht atëherë kur dikush tentoi të tallej, të përdorte për fasadë një kandidaturë që vlente pak shumë pak, jo thjesht si individ, por nga mënyra sesi vinte në garë. Fajtor nuk rezulton të jetë as Artan Shkëmbi, as PS-ja e as PD-ja. Verdiktin e dhanë pogradecarët dhe Pogradeci ka sy dhe veshë, liqeni nuk fle, buron dhe derdhet diku. Askiush nuk mund të tallet me Pogradecin dhe pogradecarët duke i quajtur tufë delesh që votojnë kë do Iliri apo miqtë e tij në Pogradec.