web counter
LEXO PA REKLAMA!

SHKARKO APP

App Store
Google Play

Qeveria "sulm" ne shtator

19 Gusht 2015, 06:24, Aktualitet CNA

Furtunë në horizont për bizneset, tatimpaguesit e favorizuar, administratën, abuzuesit me pyjet, ujin, energjinë dhe ndërtimet. Gropa e frikshme në buxhetin e shtetit, për shkak të shthurjes së doganave dhe tatimeve, po shtyn qeverinë shqiptare drejt veprimeve dëshpëruese dhe masave ekstreme, për të kompensuar dhjetëra miliona USD që mungojnë në arkën e shtetit. Ndërprerja e parakohshme e pushimeve nga Edi Rama, me argumentin se presin punë të rëndësishme në Tiranë, nuk ishte e rastësishme.   Sipas burimeve, kryeministri Edi Rama, në bashkëpunim dhe koordinim me të gjitha degët e qeverisë dhe drejtoritë e rëndësishme, po përgatitet për një luftë të gjithanshme dhe të pakompromis kundër informalitetit.

Ofensiva pritet të nisë në muajin shtator, çka përkon edhe me nisjen e sesionit të ri parlamentar, ndërsa aktualisht kryeministri po kujdeset për të gjitha modalitetet e aksionit. Sipas burimeve, gjatë ditëve të fundit, një qarkore ka shkuar për të gjithë ministritë e linjës, të cilat duhet të marrin masat në bazë të funksioneve dhe detyrave gjatë aksionit kundër informalitetit në shtator. Ndërsa ndryshimet në qeveri janë ende në pikëpyetje, mësohet se aktualisht po hetohet një plan masash, të cilat do të zbatohen që në ditët e para të shtatorit. Aksioni do të fokusohet tek bizneset informale, bizneset me dy bilance, tek mospagimi i disa bizneseve, tek ndalja e favoreve, gjetja e kanaleve të kontrabandës etj. Po ashtu do të ketë një mobilizim dhe shtrëngim të administratës tatimore, e cila në mos është kapur pjesërisht nga korrupsioni, ka humbur kontrollin. Lufta ndaj informalitetit do të shtrihet edhe në fusha të tjera, si kundër ndërtimeve pa leje, vjedhjes së energjisë, prerjes së paligjshme të pyjeve, abuzimit me ujin etj.





Lajmet e fundit nga