Kryebashkiaku i Tiranës, Erion Veliaj: Tiranën e ka qeverisur politika e rrumpallës

15 Gusht 2015, 11:07, Politikë CNA

Kryebashkiaku i Tiranës, Erion Veliaj ka nisur aksionin për lirimin e hapësirave publike, nga njësia 5. Ai është shprehur mjaft i vendosur për të mbajtur një ndër premtimet e fushatës së tij elektorale dhe i është lutur qytetarëve ti kthejnë hapësirat publike kryeqytetit. Veliaj i është përgjigjur edhe akuzave të lëshuara prej kohësh nga opozita se këto aksione janë një tip fushate në vetvete. Të gjithë punonjësit e bashkisë do të jenë të angazhuar në një luftë të përditëshme për të liruar trotuaret dhe parkingjet e qytetit. Kryebashkiaku, Veliaj gjatë deklaratave të tij për media nuk harroi të thumbonte edhe paraardhësin e tij në krye të bashkisë, Lulzim Bashën. Fjala e plotë e Veliajt për media: ?Kemi ndërmend të mbajmë cdo pretim të dhënë. Sot pas paralajmërimit, qytetarët duhet të lirojnë të gjitha hapësirat publike, por sigurisht është dikush që mërzitet, sepse në një Tiranë të rrumpallës në 4 vitet e fundit gjej shesh dhe bëj përshesh ishte politika e ditës.

Ju garantoj që për cdo njeri që mërzitet për zbatimin e ligjit janë qindra e mijëra që i gëzohen zbatimit të ligjit. Shumica e qyetetarëve e duan shtetin dhe ligjin, të gjithë këta i lus për bashkëpunim, të gjithë qytetarët e tjerët që në këtë periudhë 4-vjecare kaosi kanë abuzuar me lirinë që u jep ligji i kërkoj mirëkuptimin dhe i kërkoj të kthehen aty ku mbaron liria e tyre dhe fillon liria e dikujt tjetër. Kjo nuk është cështje fushate, por ky aksion është puna jonë e përditshme. Dy metra është hapësira minimimale e një pensionisti të kalojë, dy metra i duhet një nëne apo një vajzë që të kalojë, dy metra i duhet invalidit për të kaluar në trotuar. Bëhet fjalë për ti dhënë qytetit dy metra, është formula që ne kemi rënë dakord të jetojmë në qytet. Ndaj i lus të gjithë qytetarët, sot nisim nga njësia 5-së e pastaj në të gjithë Tiranën. Ka nga ata të pakënaqur që do thonë po ne ku do shesim? Sot tregjet e bashkisë janë bosh, kushtojnë 100 lekë në ditë ku mund të shesësh sa të duash dhe nuk tatohesh as për volumin sa shet dhe as për orët që do qëndrosh. Po teksa tregjet e bashkisë janë bosh dhe trotuaret janë plot ka dicka që nuk shkon. Edhe në këtë njësi kemi disa tregje që mund të shitet, por janë bosh. Si do ndërtohen cerdhet dhe kopshtet kur nuk paguhet minimumi i tavolinës që zë. Si do paguhen shkollat kur dikush e zw parkingun me vazo, blloqe betoni dhe matrapik dhe nuk paguan minimumin e parkingut që ne të ndërtojmë shkolla. Qeveria dhe bashkia nuk i pret paratë me gërsherë. Ne na duhet cdo qindarka që mund të paguhet prenda detyrimit ligjor. Tarifat e bashkisë janë modeste, por minimumi duhen paguar?.