Rama - Basha, aleancë kundër Ilir Metës

12 Gusht 2015, 07:22, Politikë CNA

Provokimi i divergjencave në koalicionin qeverisës, pikërisht pas zgjedhjeve lokale dhe në gjysmën e dytë të mandatit qeverisës, nuk është një lëvizje politike e rastësishme, aq më tepër një limonadë verore. Përtej qetësisë së rreme dhe tendencës për të minimizuar turbullirat në koalicion, duket se fshihet riaktivizimi i paktit mes Edi Ramës dhe Lulzim Bashës kundër Ilir Metës. Ngjizja e aleancës politike Rama-Basha lidhet me vizitën e veshur me mister të George Soros, në Tiranë, vitin e kaluar, ku zhvilloi takime kokë më kokë me Edi Ramën dhe Lulzim Bashën, duke shmangur Ilir Metën. Koha për të vënë në zbatim mësimet dhe porositë e Sorosit duket se ka ardhur. Gjithçka lidhet me rezultatin në zgjedhjet e 21 Qershorit dhe trendin në rritje të Lëvizjes Socialiste për Integrim. Rritja e frikshme me 80 mijë vota e Lëvizjes Socialiste për Integrim, në zgjedhjet e fundit lokale, përballë rënies me 300 mijë vota të Partisë Socialiste dhe rrudhjes së Partisë Demokratike me 200 mijë vota, ka zverdhur Edi Ramën dhe Lulzim Bashën, pozitat politike të të cilëve sa vijën edhe lëkunden nga njëra palë zgjedhje në tjetrën. Nëse Lulzim Basha, me disfatën e 21 Qershorit, theu çdo rekord humbjeje të Sali Berishës, Edi Rama ka shënuar fitoren më të hidhur në karrierën e tij politike. Në këto kushte, të bashkuar nga ky shqetësim i përbashkët, Lulzim Basha dhe Edi Rama, ka dhënë sinjalet e para për goditjen e Ilir Metës në zgjedhjet e 2017.

Plani anti-Meta

Edhe nëse divergjencat e gushtit nuk çojnë në prishjen e koalicionin në shtator, kryeministri Rama, me këtë lëvizje, duket se po përgatit terrenin për t?i pamundësuar Ilir Metës pjesëmarrjen në koalicionin e PS në zgjedhjet e 2017. Sipas zhvillimeve të ditëve të fundit, Rama-Meta do të konsumojnë sëbashku mandatin katërvjeçar, por gjasat janë që, LSI do t?i imponohet largimi nga koalicioni i PS, në sfidën e zgjedhjeve të 2017. Nga ana tjetër, Lulzim Basha, ditët e fundit, me anë të Edi Palokës, ka përjashtuar çdo mundësi për një koalicion të mundshëm me LSI. Në këto kushte, Edi Rama dhe Lulzim Basha po e shtyjnë Ilir Metën që të garojë i vetëm në zgjedhjet parlamentare të 2017. Por çfarë ndodh nëse Ilir Meta garon i vetëm në zgjedhjet parlamentare? Lëvizja Socialiste për Integrim humbet automatikisht komisionerët në të gjitha komisionet e administrimit të zgjedhjeve në Shqipëri. Me humbjen e statusit të partisë së dytë më të madhe në pushtet, LSI humbet automatikisht anëtarin në Komisionin Qendror të Zgjedhjeve, anëtarët në të gjitha qendrat e votimit si dhe anëtarin në grupet e numërimit të votave. Sipas këtij skenari, komisionerët e LSI i kalojnë partisë tjetër të dytë më të madhe në pushtet, konkretisht PDIU ose çdo partie tjetër, sipas formulës së parashikuar në Kodin Zgjedhor. Sipas këtij skenari, për të cilin janë dhënë edhe shenjat e para, PD-PS do të numërojnë votat e LSI në zgjedhjet e 2017. Synohet të përsëritet bashkëpunimi i vitit 2008, çka solli në monopolizimin dhe kontrollin e Parlamentit dhe të jetës politike nga Rama dhe Berisha.

Rritja e pragut elektoral

Edi Rama dhe Lulzim Basha mund të godasin Ilir Metën me anë të ndryshimeve në Kodin Zgjedhor. Bëhet fjalë për rritjen e pragut elektoral. Ndonëse nuk kanë artikuluar ende publikisht asnjë propozim konkret, Partia Demokratike dhe Partia Socialiste pritet t?i rikthehen paktit të vjetër të 2008, kur bashkëpunuan për përjashtimin e partive të tjera nga Parlamenti, me anë të rritjes së pragut elektoral. Edhe pse në zgjedhjet e fundit parlamentare LSI mori mbi 17 përqind të votave, duke shkurtuar diferencën me PD, Rama dhe Basha kanë dhënë sinjalet e para për mundësinë e rritjes së pragut elektoral, për të fuqizuar pozitat e tyre nga partitë e vogla. Gjatë ditëve të fundit, Rama dhe Basha kanë hapur debatin e ndryshimit të Kodit Zgjedhor, për të testuar dhe lexuar qëndrimet e partive të tjera, sidomos të LSI. Në shtator pritet të ketë propozime konkrete për ndryshimin e ligjit elektoral.