Hapja e dosjeve, ja kategoritë e spiunëve që nuk zbulohen

6 Gusht 2015, 11:14, Aktualitet CNA

Me anë të një propozimi të fshehtë, ligjvënësit shqiptarë kanë vendosur se zyrtarët që kanë marrë certifikatë pastërtie nga dy komisionet në vitet ’95 nuk mund të jenë objekt verifikimi dhe për rrjedhojë, komisioni i hapjes së dosjeve, nuk mund të pranojë asnjë kërkesë për informacion. Është amenduar pikërisht neni 28 i ligjit për hapjen e dosjeve. “Autoriteti nuk administron kërkesat për informacion për zyrtarët që propozohen të emërohen në institucionet kushtetuese dhe autoritetet publike kur ata kanë marrë certifikatën e pastërtisë së figurës nga organet kompetente sipas ligjit nr. 8001, datë 22.09.1995, “Për Genocidin dhe krimet kundër njerëzimit kryer në Shqipëri gjatë sundimit komunist për motive politike, ideologjike dhe fetare” si dhe ligjit nr. 8043, datë 30.11.1995 “Për Kontrollin e figurës së zyrtareve dhe personave të tjerë që lidhen me mbrojtjen e shtetit demokratik”, thuhet në nenin 28 të ligjit, i ndryshuar nga Komisioni i Sigurisë Kombëtare.

Diktohet përgjigja e komisionit

Deputetët e Kuvendit të Shqipërisë kanë vendosur të diktojnë me ligj edhe përgjigjen e komisionit për hapjen e dosjeve ndaj një kërkese për verifikimin e të shkuarës së një zyrtari. “Në nenin 28 të shtohen pikat 2, 3 dhe 4 me këtë përmbajtje: Autoriteti ju përgjigjet institucioneve kushtetuese dhe autoriteteve publike për zyrtarin që emërohet/promovohet, respektivisht në se: a) ka qenë, ose jo person në ndjekje për spiunazh apo terrorizëm; b) ka qenë, ose jo bashkëpunëtor aktiv i ish-Sigurimit të Shtetit, sipas përcaktimeve të këtij ligji. c) nuk figuron në dokumentet e ish-Sigurimit të Shtetit. Institucionet kombëtare dhe autoritetet publike në kuadër të transparencës dhe në funksion të vlerësimit të cilësive etike, morale dhe profesionale të zyrtarëve përpara emërim/promovimit, udhëhiqen nga parimi i mosndëshkimit kolektiv dhe të drejtave dhe interesave të individit”, thuhet në amendamentin, i cili është miratuar nga Kuvendi. Përjashtohen edhe deputetët Deputetët e Parlamentit Shqiptar kanë ndryshuar rrugës ligjin për hapjen e dosjeve, duke përjashtuar veten si subjekte të verifikimit. Nëse për asgjë nuk kanë rënë dakord në këto 25 vite, Partia Socialiste dhe Partia Demokratike, duket se kanë rënë dakord në heshtje për të shpëtuar dhe përjashtuar veten nga procesi i hapjes së dosjeve. Një grup deputetësh të Parlamentit, ishbashkëpunëtorë të niveleve të ndryshme të Sigurimit të Shtetit, kanë lobuar dhe lëvizur çdo gur, duke ndërhyrë në projektligjin për hapjen e dosjeve, në të cilin janë përjashtuar deputetët si subjekte verifikimi. Në çdo ligj të propozuar deri më tani për hapjen e dosjeve dhe lustracionin, deputetët kanë qenë subjekt verifikimi. Ndërkaq, ligji i ri ka përjashtuar me kujdes deputetët. Më konkretisht, për zbatimin e ligjit për hapjen e dosjeve krijohet Autoriteti për Informimin mbi Dokumentet e ish-Sigurimit të Shtetit. Ky autoritet mund të verifikojë dhe është i detyruar t’i përgjigjet çdo kërkese për informacion, për çdo kategori zyrtari të lartë, duke përjashtuar vetëm deputetët. Pra, dosjet e deputetëve nuk do të hapen. Gjithashtu, kandidatët për deputetë nuk do të verifikohen nga Autoriteti para se të marrin mandatin.