Ligji i ri/ Ja si do emërohen dhe shkarkohen mësuesit nga puna

25 Qershor 2015, 05:14, Sociale CNA

Janë botuar në Fletoren Zyrtare ndryshimet e reja në ligjin për arsimin parauniversitar në Shqipëri. Përpos të tjerave, ligji parashikon rregulla dhe procedura të tjera për emërimin dhe shkarkimin e mësuesve në institucionet arsimore. Konkretisht, ligjvënësit kanë ndryshuar nenin 60 të ligjit për arsimin parauniversitar, i cili rregullonte emërimin dhe shkarkimin e mësuesve. Me ndryshimet e reja, mësuesit emërohen nga drejtori i shkollës, ndërsa shkarkohen po nga drejtori, por me kërkesë të prindërve. Në bazë të nenit 8, i cili ndryshon nenin 60 të ligjit për arsimin parauniversitar, në pikën 1 të tij parashikon se drejtori i shkollës emëron mësuesit me konkurrim të hapur, dhe në komisionin e vlerësimit marrin pjesë edhe përfaqësues të prindërve. ?1. Në institucionin arsimor publik, për një vend të lirë pune, mësuesi emërohet nga drejtori i institucionit arsimor, me konkurrim të hapur. Në komisionet e vlerësimit marrin pjesë përfaqësues të prindërve. Procedurat e konkurrimit dhe vlerësimit përcaktohen me udhëzim të ministrit?, thuhet në pikën 1 të nenit 8 të ligjit të ri. Në pikën 2 të nenit 8 thuhet se drejtori i shkollës shkarkon mësuesit me kërkesë të prindërve. ?Drejtori i institucionit arsimor publik fillon procedurën e largimit të mësuesit edhe me kërkesë të prindërve dhe vendos largimin pasi konsultohet me përfaqësues të prindërve të institucionit arsimor, sipas procedurave të përcaktuara me udhëzim të ministrit?, thuhet në pikën 2 të nenit 8.

Si ka ndryshuar neni 60

Në komisionin e vlerësimit për emërimin e mësuesve merr pjesë vetëm kryetari i Këshillit të Prindërve, ndryshe nga neni 8 i ligjit të ri, që marrin pjesë disa përfaqësues të prindërve. ?Në institucionin arsimor publik, për një vend të lirë pune, mësuesi emërohet nga drejtori i institucionit me konkurrim të hapur, pas propozimit të kandidaturave të komisionit për vlerësimin. Komisioni ka në përbërje të tij një përfaqësues nga njësia arsimore vendore, kryetarin e bordit të institucionit, kryetarin e këshillit të prindërve të institucionit dhe dy mësues që zgjidhen nga këshilli i mësuesve në atë institucion. Një nga mësuesit me përvojën më të gjatë në atë institucion drejton komisionin e vlerësimit. Procedurat e vlerësimit përcaktohen me udhëzim të ministrit?, thuhet në pikën 1 të nenit 60 të ligjit ekzistues për arsimin parauniversitar. Ndërsa në pikën 2 është e drejtë direkt e drejtorit të shkollës për të shkarkuar mësuesit, ndryshe nga neni 8 i ligjit të ri, i cili parashikon se mësuesi shkarkohet me propozim të prindit dhe më pas është drejtori që firmos shkarkimin e tij. ?Drejtori i institucionit publik largon mësuesin nga institucioni për: a) shkelje të dispozitave të Kodit të Punës, të këtij ligji e të akteve të tjera nënligjore; b) shkelje të etikës e të sjelljes në institucion; c) mosarritje të nxënësve, të përcaktuara në mënyrë objektive, si testimet e drejtorisë së institucionit ose të njësisë arsimore vendore, rezultatet në provimet kombëtare dhe vlerësimi i Inspektoratit Shtetëror të Arsimit?, thuhet në pikën 2 të nenit 60.

Gazeta SOT