web counter
LEXO PA REKLAMA!

SHKARKO APP

App Store
Google Play

Arlind Qori: Protesta masive dhe bojkot në vjeshtë nëse miratohet drafti për arsimin e lartë

20 Qershor 2015, 06:31, Sociale CNA

Lëvizja për Universitetin ka paralajmëruar protesta masive dhe bojkote të universiteteve nëse Kuvendi miraton draftin për arsimin e lartë. Pedagogu dhe aktivisti i Lëvizjes për Universitetin, Arlind Qori,  ka renditur dëmet që do të sjellë drafti i Ministrisë së Arsimit nëse miratohet nga deputetët në formën aktuale dhe reagimet që priten nga studentët.

Qori është shprehur se çdo ditë që drafti do të diskutohet në komisione studentët do të jenë para Kuvendit për të protestuar. Por ai ka paralajmëruar përshkallëzim të masave nëse ky draft miratohet, deri në bllokim të jetës universitare. Arlind Qori u shpreh se nëse deputetët nuk e dëgjojnë zërin e tyre, gjatë vjeshtës do të ketë protesta masive. Sa i përket dëmeve që mund të sjellë drafti, ai ka deklaruar se universitetet publike do të shkojnë drejt falimentimit, ndërsa është shprehur se pas miratimit të tij universitetet private do të mund të përfitojnë lirisht fonde nga buxheti i shtetit.

Një tjetër dëm që sjell sipas tij ky draft, është shtimi i organizmave burokratike, siç është Bordi i Administrimit, duke deklaruar se do të cenohet autonomia. Pedagogu Qori, si dhe një ndër ata persona që ka protestuar fuqishëm kundër këtij drafti, ka deklaruar gjithashtu se me miratimin e tij studentët do të përjashtohen nga vetëqeverisja e universitetit. Studentët e Lëvizjes për Universitetin shpesh herë kanë protestuar kundër këtij drafti me argumentin se do të rriten tarifat studimore, ndërsa sipas Qorit jo vetëm që do të rriten, por shumë shpejt arsimi i lartë do të jetë një luks vetëm i të pasurve.





Lajmet e fundit nga