Kompensimi i ish pronarëve, nis sot aplikimi për 550 përfitues

19 Qershor 2015, 07:21, Ekonomi CNA

Agjencia e Kthimit dhe Kompensimit të Pronave nis sot procesin e pranimit të kërkesave për shpërndarjen e kësteve për kompensimin e pronarëve të pasurive të paluajtshme, pronë private, që preken nga ndërtimet informale, emrat e të cilëve janë miratuar me VKM Nr.449, datë 27.05.2015. bëhet fjalë për 550 përfitues nga Tirana, Shkodra dhe Elbasani.

Burime zyrtare nga AKKP bënë me dije se në mbështetje dhe në zbatim të VKM Nr.383, datë 19.05.2010 “Për përcaktimin e procedurave të shpërndarjes së fondit të kompensimit në vlerë për pronarët e pasurive të paluajtshme, pronë private, që preken nga ndërtimet informale”, i ndryshuar, sot nis procesi i pranimit të kërkesave për shpërndarjen e kësteve për kompensimin e pronarëve të pasurive të paluajtshme, pronë private, që preken nga ndërtimet informale, emrat e të cilëve janë miratuar me VKM Nr.449, datë 27.05.2015 “Për shpërblimin e pronarëve mbi sipërfaqet takuese të pasurive të paluajtshme, pronë private, që preken nga ndërtimet informale”.

Procesi i pranimit të kërkesave të përfituesve nga ky fond, i cili nis ditën e sotme me 19. 06. 2015, nuk do të jetë i kushtëzuar apo limituar në afat. AKKP u bën thirrje të gjithë subjekteve interesuara, emrat e të cilëve janë miratuar me VKM Nr.449, datë 27.05.2015, të paraqiten pranë zyrave të saj për dorëzimin e kërkesës për kompensim nga fondi i ALUIZNI-t. AKKP ka ngritur grupin e punës, i cili do të kryejë pranimin dhe regjistrimin e kërkesave të subjekteve të interesuara. Të gjithë subjektet e interesuara mund të paraqiten në Agjencinë e Kthimit dhe Kompensimit të Pronave, çdo ditë nga e hëna në të premte, ora 09:00-12:00. Të dhënat e subjekteve përfitues janë të evidentuara në listën që i bashkëlidhet VKM Nr.449, datë 27.05.2015, ku përcaktohet dhe shpërblimi i pronarëve të pasurive të paluajtshme, pronë private, që preken nga ndërtimet informale të miratuara deri më tani. Aplikuesit kanë detyrimin të paguajnë tarifën e shërbimit në vlerën prej 2 000 lekë dhe gjithashtu të hapin në emër dhe për llogari të tyre, një llogari bankare në njërën nga bankat e nivelit të dytë.