E fundit!

14:27 Politikë

Rama: Nëse këtu do të kishte lavatriçe parash të pista, nuk do të mbyllnim kapituj me BE-në

Në aktivitetin e programit “Dyfisho sipërmarrjen tënde”, k...

Rama-Ruçi propozojnë Shpëtim Idrizin nënkryetar Parlamenti, Arta Dade kundër, si ndryshoi plani për rrëzimin e Vangjel Dules, debate në grupin e PS

21 Maj 2015, 06:39, Politikë CNA

Grupi parlamentar i Partisë Socialiste, në mbledhjen e djeshme me dyert të mbyllura, ka propozuar emërimin e kryetarit të PDIU, Shpëtim Idrizit, në postin e nënkryetarit të Kuvendit të Shqipërisë. Në mbledhjen e djeshme të grupit më të madh parlamentar, pas diskutimeve për çështjet e tjera, disa deputetë kanë propozuar emërimin e Idrizit si nënkryetar të Parlamentit. Kreu i çamëve, vetëm disa javë më parë, vendosi të braktiste opozitën shqiptare, duke u rreshtuar në koalicionin e pushtetit, në zgjedhjet lokale të 21 Qershorit. Sipas burimeve, propozimi është bërë formalisht nga disa deputetë, pasi ideja për emërimin e Idrizit është hedhur nga kryeministri Edi Rama dhe kryetari i grupit parlamentar socialist, Gramoz Ruçi. Fillimisht pati zëra se kryeministri Edi Rama kishte propozuar shkarkimin e Vangjel Dules nga posti i nënkryetarit të Parlamentit, pas vendimit të kreut të PBDNJ për të braktisur koalicionin e mazhorancës, duke garuar i vetëm në zgjedhjet e 21 Qershorit. Në vend të Dules, Rama kishte projektuar Shpëtim Idrizin. Por, ky plan ka ndryshuar gjatë orëve të fundit. Kështu, Rama ka hequr dorë nga shkarkimi i Dules, ndërsa në bashkëpunim me Metën ka vendosur që Parlamenti të ketë tre nënkryetarë, konkretisht: Vangjel Dulen, Edmond Spahon dhe Shpëtim Idrizin. Sipas burimeve, Rama është tërhequr nga shkarkimi i Dules, për të mos shkaktuar një tjetër frakturë në marrëdhëniet mes Tiranës dhe Athinës. Emërimi i një përfaqësuesi të minoritetit grek nënkryetar i Parlamentit Shqiptar është lexuar nga ndërkombëtarët si një tjetër shenjë, e cila konfirmon se Shqipëria është vend model për respektimin e pakicave. Me sa duket, Rama ka vendosur të mos e zhbëjë këtë standard.

Arta Dade kundra

Propozimi për emërimin e Shpëtim Idrizit në postin e nënkryetarit të Parlamentit është kundërshtuar nga kryetarja e Komisionit të Jashtëm, Arta Dade. Zonja Dade ka pohuar se Idrizi nuk e frekuenton jetën parlamentare, ndaj sipas saj, krye i PDIU nuk duhet të propozohet dhe të miratohet në këtë post. Dade e ka parë të panevojshëm shtimin e numrit të nënkryetarëve të Kuvendit. Por, sipas burimeve, kreu i grupit parlamentar socialist, Gramoz Ruçi ka pohuar se PS ka detyrime ndaj Idrizit, detyrime që burojnë nga marrëveshja parazgjedhore. Shumica e grupit parlamentar të PS kanë qenë pro emërimit të Idrizit.

Zëvendëskryetarët e Kuvendit

Sipas Rregullores së Parlamentit, zëvendëskryetarët bashkëpunojnë me Kryetarin e Kuvendit për realizimin e detyrave të Kryetarit; ata thirren për këshillim nga kryetari sa herë shihet e nevojshme. Në rast se kryetari mungon ose është në pamundësi të kryejë detyrat e tij, ai autorizon një nga zëvendëskryetarët për kryerjen e tyre. Në mungesë të autorizimit, ai zëvendësohet nga zëvendëskryetari i Kuvendit që i përket shumicës parlamentare.

Dekretet e Nishanit

Grupi parlamentar i Partisë Socialiste, në mbledhjen e djeshme me dyer të mbyllura, ka rikonfirmuar edhe një herë vendimin për të rrëzuar çdo dekret të kreut të shtetit Bujar Nishani, për anëtarë në Gjykatën e Lartë dhe Gjykatën Kushtetuese. Në mbledhje është vendosur që të rrëzohet çdo kandidaturë e propozuar nga Nishani në kundërshtim me ligjin e ri për Gjykatën e lartë. Në fokus të mbledhjes së grupit parlamentar socialiste ka qenë edhe seanca e sotme plenare. Deputetët e shumicës kanë diskutuar mbi modalitetet e votimit, qëndrimet, mbrojtjen e projektligjeve etj. /sot.com