BSH: Për herë të parë bie besimi tek ekonomia

16 Prill 2015, 06:12, Ekonomi CNA

Banka e Shqipërisë në publikimin e treguesit konfirmoi se kjo rënie frenoi prirjen rritëse të regjistruar që prej tremujorit të katërt të vitit 2013. Rënia me 4.6 e treguesit të besimit shënon të parën që kur të majtët erdhën në pushtet në vitin 2013.

Treguesi i Ndjesisë Ekonomike (TNE) ra me 4.6 pikë në tremujorin e parë të vitit 2015, duke shënuar rënien e parë që kur të majtët erdhën në pushtet. Banka e Shqipërisë në publikimin e treguesit konfirmoi se kjo rënie frenoi prirjen rritëse të regjistruar që prej tremujorit të katërt të vitit 2013.

Bizneset pesimiste, ka rënë konsumi

Bazuar në vlerësimet e bizneseve, situata ekonomike dhe gjendja e përgjithshme e firmës është vlerësuar e përkeqësuar gjatë tremujorit të parë të vitit 2015. Balancat përkatëse ranë me 6.7 dhe 14.1 pikë përqindje. Bizneset kanë vlerësuar në rënie si kërkesën e brendshme, ashtu edhe kërkesën e jashtme. Pritjet për tremujorin e dytë janë optimiste lidhur me gjendjen e përgjithshme të firmës, rritjen e eksporteve dhe me porositë e reja.

Norma e shfrytëzimit të kapaciteteve në industri rezultoi në nivelin 67.7% në tremujorin e parë, rreth 4 pikë përqindje më e ulët se norma historike. Çmimet e prodhimit janë vlerësuar me një rritje të lehtë gjatë tremujorit të parë. Balanca e investimeve të reja të kryera nga bizneset e industrisë gjatë gjashtë muajve të shkuar është përmirësuar.

Këto investime vijojnë të jenë kryesisht për blerje pajisjesh të reja dhe më pak për investime në struktura. Bizneset në sektorin e tregtisë kanë vlerësuar në rënie situatën e ekonomisë në përgjithësi në tremujorin e parë të vitit. Balanca përkatëse u ul me 6.9 pikë përqindje në krahasim me tremujorin e fundit të vitit 2014. Njëkohësisht, vlerësimi për kërkesën është ulur me 7.9 pikë përqindje në tremujorin në analizë.

Në linjë me kërkesën e dobët dhe me gjendjen e përkeqësuar të biznesit, bizneset e tregtisë kanë vlerësuar në rënie çmimet e mallrave në këtë sektor. Norma e shfrytëzimit të kapaciteteve në tregti në tremujorin e parë shënoi 75.8%, normë kjo rreth 3.3 pikë përqindje më e ulët se ajo e shënuar në tremujorin e kaluar dhe 3.4 pikë përqindje më e ulët se mesatarja e katër viteve të fundit.

Konsumatorët: Kostoja e jetesës është rritur

Besimi i konsumatorëve te Treguesi i Besimit të Konsumatorëve (TBK) ra me 2.7 pikë përqindje në tremujorin e parë të vitit, duke konfirmuar trendin rënës të nisur në tremujorin e kaluar. Rënia e TBK-së reflektoi kryesisht përkeqësimin e balancës së blerjeve të mëdha, e cila ra me 9.2 pikë përqindjeje.

Në përkeqësimin e treguesit të besimit kontribuan edhe pritjet e konsumatorëve për situatën ekonomike dhe financiare në vend. Nga ana tjetër, balanca e shpenzimeve/të ardhurave pësoi një përmirësim të lehtë gjatë tremujorit në analizë, duke ndikuar pozitivisht në TBK.

Konsumatorët e vlerësojnë situatën financiare dhe ekonomike në vend të përkeqësuar në tremujorin e parë të vitit. Pritjet e tyre për nivelin e papunësisë në gjashtë muajt e ardhshëm janë pesimiste. Kjo balancë u rrit me 1.1% (rritja e balancës tregon për rritje të papunësisë së pritur).

Gjithashtu, konsumatorët perceptojnë kosto të rritur jetese, ndërsa balanca e kursimeve ka pësuar një rënie të lehtë. Pritjet për inflacionin pas një viti u ulën në tremujorin e parë, përkatësisht në 1.4%, nga 1.8% që rezultonin tremujorin e mëparshëm.