Rritja në remitancat globale do të ngadalësohet ndjeshëm gjatë 2015

14 Prill 2015, 09:42, Ekonomi CNA

Rritja në dërgesat globale, përfshirë ato të vendeve në zhvillim, do të ngadalësohet ndjeshëm këtë vit për shkak të rritjes së dobët ekonomike në Evropë, përkeqësimit të ekonomisë ruse dhe zhvlerësimit të euros dhe rublas, sipas raportit të fundit të Migracionit dhe Zhvillimit të Bankës Botërore.

Remitancat e regjistruara zyrtarisht në vendet në zhvillim pritet të arrijnë 440 miliard euronë 2015, një rritje prej 0.9 për qind gjatë vitit të kaluar. Dërgesat globale, përfshirë edhe ato të vendeve me të ardhura të larta, parashikohet të riten me 0.4 përqind në 586 miliard dollarë.

Normat e rritjes së remitancave në 2015 janë më të ulëtat që prej krizës financiare globale në 2008/09. Megjithatë, numri i migrantëve ndërkombëtarë pritet të kalojë 250 milion gjatë 2015, dhe kursimet dhe dërgesat e tyre pritet të vijojnë në rritje.

Ngadalësimi në rritjen e remitancave të emigrantëve këtë vit do të ndikojë shumicën e rajoneve në zhvillim, në veçanti Evropën dhe Azinë Qendrore ku flukset pritet të bien me 12.7 për qind në 2015.

Ndikimi pozitiv i rimëkëmbjes ekonomike në SHBA do të neutralizohet pjesërisht nga dobësia e vazhdueshme në zonën e euros, ndikimi i çmimeve më të ulëta të naftës mbi ekonominë ruse, forcimi i dollarit amerikan dhe kontrolleve të forta të emigracionit në shumë vende, burim i remitancave.

Në përputhje me pritshmërinë globale të rimëkëmbjes ekonomike vitin e ardhshëm, flukset e remitancave globale pritet të përshpejtohen me 4.1 për qind në vitin 2016, për të arritur në rreth 610 miliard dollarë, duke u rritur në 636 në vitin 2017. Fluksi i remitancave ndaj vendeve në zhvillim pritet të rimarrë veten në 2016, për të arritur shifrën prej 459 miliard dollarë, duke u rritut në 479 miliard dollarë në 2017.

Të pesë destinacionet kryesore të migrimit vazhdojnë të jenë Shtetet e Bashkuara, Arabia Saudite, Gjermania, Rusia dhe Emiratet e Bashkuara Arabe (EBA). Të pesë vendet marrëse të remitancave, në aspektin e vlerës së tyre, vazhdojnë të jenë India, Kina, Filipinet, Meksika dhe Nigeria.

Monitor