E fundit!

12:36 Politikë

"Të thuash ke shpirtin e bukur, vetë ti mund ta bësh"/ Lamallari ironizon Balliun: Je delirant

Ministri i Brendshëm, Besfort Lamallari në interpelancën e...

Interesat e ulta, kursehen 30 milionë euro nga shërbimi i borxhit të brendshëm

15 Prill 2015, 07:14, Ekonomi CNA

Shërbimi i borxhit të brendshëm në fund të vitit 2014 vlerësohet në ulje me 4.2 miliardë lek për shkak të efektit që jep kryesisht ulja e normave të interesit të instrumenteve afatshkurtër që janë emetuar gjatë 6-mujorit të dytë të vitit 2013 dhe në vazhdim gjatë vitit 2014.

Ministria e Financave pohon se, ndërkohë, për sa i përket borxhit të jashtëm interesat e tij në shumë absolute vlerësohen me 1 miliard lekë rritje si rezultat i shtimit të disbursimeve dhe stokut të borxhit të jashtëm. Për këtë shkak edhe ri-pagesat e borxhit të jashtëm në fund të vitit 2014 vlerësohen në rritje me rreth 5.8 miliardë lekë.

Ministria e Financave nisur nga të dhënat e mësipërme dhe duke e parë edhe në vizionin afatgjatë, vlerëson të rëndësishëm angazhimin për uljen e stokut të borxhit në mënyrë që të menaxhohen kostot që shoqërojnë huamarrjen.

Në tregun primar, normat e interesit të instrumenteve të qeverisë me maturitet deri në 2 vite kanë pësuar rënie të konsiderueshme krahasuar me fundin e vitit 2013 duke kapur kështu edhe vlerat më të ulëta historike, ndërkohë që titujt me maturitet mbi 2 vite, (përjashtuar obligacionet 10-vjeçare të cilat nuk kanë pësuar asnjë ndryshim) kanë pësuar rritje. Kjo tendencë ka nisur që prej muajit janar dhe është theksuar edhe në periudhën në vazhdim.

Kërkesa dhe likuiditeti i ofruar nga pjesëmarrësit në tregun primar të titujve qeveritarë afatshkurtër ka qenë më e lartë krahasuar me titujt afatgjatë. Ndërkohë, mosrealizimi i ankandeve të obligacioneve ka krijuar presione për rritjen e normave të interesit dhe ka bërë që kurba e normave të interesit të titujve afatgjatë të shfaqet e zhvendosur lart.

Gjatë këtij viti instrumentet që kanë pësuar rënien më të madhe të normave të interesit janë bonot e thesarit 3-mujore dhe 12-mujore, normat e të cilave janë ulur përkatësisht me 48 dhe 44 pb krahasuar me fundin e vitit 2013. Ndërkohë instrumentet, normat e të cilave kanë pësuar rritje, janë obligacionet 3 dhe 7-vjeçare, përkatësisht me një rritje prej 34 dhe 22 pb.

Monitor