E fundit!

16:59 Aktualitet

Dritan Prençi, kasaphanë me dosjen e inceneratorit të Tiranës

Avokatja Adriana Kalaja e ka cilësuar si kasaphanë punën e...

Ambasadori amerikan në Shqipëri nuk ka njohuritë minimale gjeografike për vendet e NATO-s

5 Prill 2015, 06:36, Aktualitet CNA

Nga Kastriot MYFTARAJ

Duke folur në ceremoninë për gjashtë vjetorin e hyrjes së Shqipërisë në NATO, në 3 prill, ambasadori amerikan në Shqipëri Donald Lu tha: ?Shqipëria mund të jetë vendi anëtar më i vogël në aleancë, por është vendi më entuziast.?
Kjo është një gafë e çuditshme gjeografike, madje gjeopolitike, që tregon se ambasadori amerikan në Shqipëri nuk ka as njohuritë minimale gjeografike për vendet anëtarë të NATO-s.

Shqipëria nuk është vendi më i vogël i NATO-s. Luksemburgu dhe Sllovenia janë vende të më të vegjël se Shqipëria, si përsa i përket sipërfaqes, ashtu edhe popullsisë. Islanda dhe Estonia janë vende më të vegjël se Shqipëria përsa i përket popullsisë. Mund të ketë diskutime nëse Islanda, pjesa më e madhe e territorit të së cilës është e ngrirë në çdo stinë të vitit, dhe që nuk ka fare ushtri, të mund të quhet një vend anëtar i aleancës më i madh se Shqipëria. Në çdo rast, Shqipëria nuk është vendi anëtar më i vogël i aleancës.

Ambasadori amerikan ka bërë një gafë të madhe gjeografike, madje gjeopolitike, e cila nëse do të ishte thënë në një vend tjetër të NATO-s do të kishte bërë përshtypje të madhe dhe do të ishte komentuar në terma kritike. Se kjo praktikisht prek integritetin dhe tërësinë territoriale të Shqipërisë. Në fantazinë e ambasadorit amerikan Shqipëria i ka më pak se 2584 km² sa i ka Luksemburgu, vendi anëtar më i vogël i aleancës. Pra ambasadori amerikan e privon Shqipërinë nga 26500 km², ose mbi 90% të territorit të shtetit shqiptar. Gjithashtu ambasadori amerikan e privon Shqipërinë nga më tepër se 80 e popullsisë së vendit.
Në çdo vend të vogël të NATO-s ku ambasadori amerikan do të kishte thënë një gjë të tillë, ai do të kishte kërkuar falje publikisht pas reagimit publik, madje edhe shtetëror të shprehur zyrtarisht. Madje do t? i ishte kërkuar SHBA që Departamenti i Shtetit t? i akomodonte injorantët e vet, në poste të tjera, jo në diplomaci e sigurisht jo në vendin përkatës. Në Shqipëri kjo thënie kaloi pa reagime. Kur pikërisht në Shqipëri duhet të kishte patur reagime se fjalimi i ambasadorit amerikan në ceremoninë e përmendur më lart u dha në të gjithë televizionet kryesore të vendit dhe shqiptarët u njohën me injorancën e ambasadorit, me zë dhe me figurë, si të thuash, madje drejtpërdrejt në gjuhën shqipe, se ambasadori foli në shqip. Pikërisht sepse në një vend si Shqipëria ambasadori amerikan është një yll televiziv lokal, i cili ftohet të flasë gjithandej për gjithcka, Departamenti i Shtetit duhet t? i porositë ata që shkojnë në Tiranë në këtë post që të jenë të kujdesshëm në ato që thonë, së paku për të mos treguar injorancë të thellë.
Gafa e ambasadorit është shumë serioze edhe për arsye se ai është një diplomat karriere, me 25 vite përvojë pune në diplomaci. Një ambasador amerikan në një vend të NATO-s duhet të ketë së paku njohuri minimale gjeografike për vendet anëtare të aleancës. Në kohën që Kina, vendi i origjinës etnike të ambasadorit Lu, ka çuar këto ditë në Shqipëri si ambasadore ish-zëdhënësen e Ministrisë së Punëve të Jashtme, pra një person të profilit të lartë ndërkombëtar, dhe me njohuri pakrahasimisht më të sakta gjeografike dhe gjeopolitike., se ato të Ambasadorit Lu, gafa e këtij të fundit duket edhe më e rëndë dhe emërimi i tij edhe më i gabuar. SHBA janë aleati kryesor strategjik i Shqipërisë, meqënëse të dy vendet bëjnë pjesë në një aleancë ku SHBA është fuqia më e rëndësishme.

Kështu që supozohet se SHBA duhet të dërgojnë si ambasador në Tiranë një ekspert më të përgatitur se Kina.
Amerikanët janë bërë anekdotikë për gafat e tyre sa i përket gjeografisë së botës, por diplomatët e karrierës, të cilët paguhen për t? i pasur edhe këto njohuri, nuk duhet të jenë në këtë klub injorantësh. Shpjegimi më dashamirës për thënien e ambasadorit amerikan do të ishte se ai nuk e di që Luksemburgu dhe Sllovenia, apo edhe Islanda janë vende anëtare të NATO-s. Ndoshta, në fantazinë e Ambasadorit Lu, në vend të tyre, shtete anëtarë të NATO-s janë Zvicra, Finlanda, apo edhe Suedia, që janë më të mëdha se Shqipëria. Zoti e di se cila është lista e vendeve të NATO-s në fantazinë e ambasadorit Lu!