E fundit!

11:19 Kronika

Akuzohet për trafikim emigrantësh/ Arrestohet 34-vjeçari egjiptian

Seksioni për Hetimin e Trafiqeve ka finalizuar operacionin...

Paloka: Qytetarët po presin dorëheqjen e Metës

10 Mars 2015, 13:08, Politikë CNA

Kryetari i grupit parlamentar, Edi Paloka, tha gjatë një konference për shtyp se qytetarët po presin vetëm një fjalë nga Ilir Meta, dorëheqjen. Ai tha se askush nuk e njeh më Metën si Kryetar Kuvendi dhe ftoi të gjithë qytetarët të dalin në protestë më 12 mars.

Deklarata e Edi Palokës:

Shqiptarët presin vetëm një fjalë nga Ilir Meta; të japë dorëheqjen e të shkojë para drejtësisë. Ai vazhdon të fshihet, vazhdon të rrijë i lidhur me çdo kusht pas karriges. Por Ilir Meta nuk do të mund të sfidojë ligjin, Kushtetutën, Drejtësinë dhe popullin. Numërimi mbrapsht ka nisur. Të enjten, shqiptarët më të bashkuar se kurrë, do të nisin aksionin për ta çliruar politikën, parlamentin dhe vendin nga sundimi i krimit. Të gjithë të bashkuar, me 12 mars në orën 11 në Sheshin Skenderbej.

Ilir Meta tregoi mbrëmë se është një i dëshpëruar që flet përçart për të shpëtuar nga akuza më e rëndë e 25 viteve në politikë, ajo e porositjes së vrasjes së dy deputetëve.

Ai është akuzuar nga radhët e mazhorancës, me zë e me figurë, se ka paguar për eleminimin fizik të dy deputetëve, ndërkohë që sheh si komardare shpëtimi sulmin ndaj opozitës.

Dje Ilir Meta u shfaq si njeriu që ka kryer krimin dhe kërkon të lajë duart: Ai pranoi se akuzat e Tomë Doshit janë mbajtur të fshehura për 6 muaj, dhe tani që ai është përjashtuar nga grupi i Partisë Socialiste, këto akuza nuk paskan më vlerë.

Gjithashtu, Meta konfirmoi akuzën kryesore të Partisë Demokratike, kur tha se kishte ftuar dhe takuar familjarë të deputetit Fufi, me një qëllim; që t?i faturonte opozitës porosinë për vrasjen e tij.

Kontradiktor dhe kaotik, Ilir Meta është sot në sytë e mbarë opinionit publik, nën akuzë për vrasjen e dy deputetëve.

Askush nuk e njeh më për kryetar kuvendi një person nën akuzën më të rëndë të Kodit Penal, e megjithatë Ilir Meta nuk jep asnjë shenjë përgjegjshmërie.

Shqiptarët presin vetëm një fjalë nga Ilir Meta; të japë dorëheqjen e të shkojë para drejtësisë. Situata është shumë e rëndë, dhe ka vënë në provë themelet e ekzistencës së shtetit, ndërsa Ilir Meta vazhdon të fshihet, vazhdon të rrijë i lidhur me çdo kusht pas karriges.

Duke qënë numri dy i shtetit, Ilir Meta e pengon drejtësinë, dhe ushtron pushtetin e tij për ta ndalur hetimin dhe zbardhjen e të vërtetës.

Qytetarët presin vetëm një fjalë nga ai. Që të japë dorëheqjen.

Dhe Ilir Meta nuk do të mund të sfidojë ligjin, Kushtetutën, Drejtësinë dhe popullin.

Numërimi mbrapsht ka nisur. Të enjten, shqiptarët më të bashkuar se kurrë, do të nisin aksionin për ta çliruar politikën, parlamentin dhe vendin nga sundimi i krimit.

Nuk do të ndalemi derisa e drejta të triumfojë.

Të gjithë të bashkuar, me 12 mars në orën 11 në Sheshin Skenderbej.