Shqiperi 774 raste/1 dhjetori, Dita Botërore e Luftës Kundër

30 Nëntor 2014, 23:00, Aktualitet CNA

Shqipëria numëron 774 raste të raportuara me HIV/AIDS, që nga shfaqja e virusit për herë të parë në vendin tonë në vitin 1993.

Të dhënat e fundit të Institutit të Shëndetit Publik tregojnë se vetëm përgjatë 2014-ës janë raportuar 75 raste të reja, dhe kanë humbur jetën 7 persona, duke bërë që vdekjet nga SIDA në vendin tonë të shkojnë në 144.

Ekspertë të sëmundjeve infektive tregojnë se ndonëse gjatë 5 viteve të fundit është vënë re një tendencë për rritje të numrit të rasteve, këtë vit falë trajtimit mjekësor është bërë e mundur që të ulet vdekshmëria mes tyre.

?Ne vëmë re një ulje të numrit të vdekjeve. Këtë vit kemi pasur 7 raste humbje jete. Kjo shifër ka një ulje gati 50 deri në 60 për qind në krahasim me vitet e mëparshme. Pra, në qoftë se shumë vite më parë të diagnostikoheshe me vdekje do të thoshte baraz vdekje, sot Aidsi është një sëmundje e cila trajtohet dhe trajtimi është gjithashtu edhe parandalim?, thotë Silva Bino, eksperte për sëmundjet infektive në ISHP.

?Me standardet aktuale, asnjë person i infektuar nuk duhet të vdesi, përkundrazi duhet të jetojë një jetë të shëndetshme, sa më cilësore, por gjithmonë në trajtim dhe nën kujdesje?, thotë Arjan Harxhi, mjek infeksionist në QSUT.

1 dhjetori, Dita Botërore e Luftës Kundër AIDS e gjen Shqipërinë me disa problematika, por sipas specialistëve shqetësues mbetet numri i ulët i testimeve vullnetare për HIV. Ata bëjnë thirrje që të mos anashkalohet më tej testimi, kryesisht nga gratë shtatzëna, pasi vetëm në harkun kohor të këtij viti janë raportuar 5 fëmijë të infektuar, 4 prej të cileve me anë të transmetimit vertikal.

?Fakti që ne vitet e fundit kemi prani të rasteve tek fëmijët e porsalindur, pra kemi transmetim nga nëna tek fëmija dhe sidomos tek të rinjtë, deri në moshën 24 vjeç, tregon që testimet vullnetare janë një element tepër i rëndësishëm ku duhet të bazohet lufta. Të kryhesh një test në lidhje me HIV AIDS-in është të parandalosh vdekjen?, u shpreh Bino.

?Numri i testimeve për HIV është shumë i ulët. Sot në Shqipëri nuk skrinohen gratë shtatzëna për të bërë të mundur identifikimin dhe parandalimin e virusit nga nëna tëek fëmija. Pra janë 5 raste të reja dhe një shifër 5 raste për Shqipërinë është një shifër alarmante?, tha Harxhi.

SIDA vazhdon të mbetet një çështje shqetësuese për shëndetin publik anë e mbanë botës. Organizata Botërore e Shëndetësisë raporton se vetëm vitin e shkuar rreth 35 milionë njerëz në mbarë botën kanë jetuar me virusin HIV, ndërsa 1.5 milion kanë humbur jetën për shkak të sëmundjeve që lidhen me të.