E fundit!

13:08 Aktualitet

Vrasja e efektivit/ Xhaxhai i Enea Mekollit ngre akuza: Ishin pa asnjë lloj mbrojtjeje

Xhaxhai i efektivit të vrarë, Enea Mekolli, Hazbi Mekolli,...

Rama dhe Tahiri mbajnë peng hetimin e Lazaratit

28 Tetor 2014, 23:00, Aktualitet CNA

Prej datës 15 shtator, Laboratori i Kriminalistikës në Ministrinë e Brendshme nuk kryen më asnjë ekspertim duke lënë kështu pezull hetimin e një prej dosjeve më të rëndësishme, ?Lazarati?. Shkak është bërë zhvendosja e Laboratorit pas urdhrit të Kryeministrit dhe ministrit të Brendshëm.

Operacioni i bujshëm që policia ndërmori në Lazarat përgjatë muajit qershor tashmë duket një sukses i tejkaluar për qeverinë, e cila ka marrë vlerësime maksimale edhe nga partnerët ndërkombëtar. Por tashmë që kanë kaluar më shumë se pesë muaj nga operacioni i suksesshëm i Lazaratit, mbi 200 dosje vazhdojnë të mbeten ende të hapura në pritje të akt-ekspertimeve nga Laboratori i Policisë Shkencore në Ministrinë e Brendshme. Bëhet fjalë për ekspertime armësh, kanabisi apo provash të tjera të sekuestruara në Lazarat gjatë operacionit të policisë, të cilat nuk janë kryer nga laboratori për shkak të pezullimit të punës që prej 15 shtatorit të këtij viti.

Shkak është bërë zhvendosja e pajisjeve të këtij laboratori nga ambientet përballë Ministrisë së Brendshme në disa mjedise të tjera, duke lënë kështu pezull mbi 200 dosje të hapura që po hetohen nga Prokuroria e Gjirokastrës dhe ajo e Krimeve të Rënda. Hetimet për këto çështje nuk mund të përfundojnë pa kryerjen e akt-ekspertimeve, të cilat janë bllokuar pas urdhrit të Kryeministrit Edi Rama dhe ministrit të Brendshëm, Sajmir Tahiri, për zhvendojen e pajisjeve të Laboratorit të Kriminalistikës. Investigim.al disponon urdhrin nr.272, datë 8.09.2014, të Kryeministrit dhe ministrit të Brendshëm, sipas të cilit, Drejtoria e Policisë Shkencore duhet të lirojë ambientet për t?u transferuar diku tjetër.

Në bazë të këtij urdhri, në datën 15 shtator 2014, Drejtori i Policisë Shkencore, Dritan Zoto ka urdhëruar pezullimin e punës së institucionit duke mos kryer asnjë akt ekspertim. Bëhet fjalë për ndërprerjen e ekepserimeve daktiloskopike, vlerësimin e gjurmëve, ekspertimet balistike, krahasimin e predhave dhe gëzhojave, faktorët plotësues të qitjes, apo ekspertime grafike për falsifikimin e dokumenteve. Kjo situatë do të vijojë deri në një urdhër të dytë, pasi të jenë zhvendosur pajisjet e Laboratorit të Kriminalistikës, i cili konsiderohet si një hallkë e rëndësishme në hetimin e çështjeve kriminale.

Por pavarësisht këtij fakti, Kryeministri dhe Mmnistri i Brendshëm me një të rënë të lapsit kanë pezulluar punën e kësaj strukture duke lënë pezull hetimet jo vetëm për dosjen ?Lazarati?, por për të gjitha krimet që kanë ndodhur në vend nga 15 shtatori i këtij viti, zbardhja e të cilëve nuk mund të bëhet pa kryerjen e ekspertimeve të nevojshme shkencore. Një prej këtyre dosjeve është ajo e ?Lazaratit?, për të cilën policia ka referuar në prokurori më shumë se 200 çështje penale pas sekuestrimit të kanabisit, armëve, apo mjeteve që përdoreshin për kultivimin e lëndëve narkotike. Shumë prej këtyre çështjeve aktualisht janë në Prokurorinë e Gjirokastrës, ndërsa një pjesë e tyre, ajo e sulmit me armë ndaj policisë, po hetohet në Prokurorinë e Krimeve të Rënda.

Por edhe pse çështjet janë referuar pesë muaj më parë, asnjë prej tyre nuk ka përfunduar dhe nuk është dërguar në gjykatë, pasi prokuroria nuk ka marrë ende aktet e ekspertimit, të cilat janë pezulluar që prej 15 shtatorit të këtij viti. Po ashtu kanë mbetur pa autor shumë armë të sekuestruara në zona të ndryshme të fshatit Lazarat apo lëndë narkotike të sekuestruara në banesa të braktisura, pasi nuk mund të kryhet asnjë ekspertim mbi gjurmët e gjetura, të cilat do të çonin në identifikimin e autorëve të këtyre veprave penale. Po ashtu është hasur vështirësi në dërgimin e çështjeve në gjyq, pasi asnjë hetim nuk mund të quhet i përfunduar nëse nuk bëhet pjesë e dosjes akt-ekspertimi për lëndën narkotike apo armët e sekuestruara për personat e arrestuar.

Këtë të mërkurë mediat publikuan një lajm sipas të cilit Drejtoria e Përgjithshme e Policisë i kishte dërguar Drejtorisë së Policisë së Gjirokastrës rreth 250 akt-ekspertime, por një gjë e tillë nuk është konfirmuar zyrtarisht. Pas më shumë se pesë muajsh policia është kujtuar se ka një çështje të rëndësishme për të hetuar, e cila u mbajt peng nga një urdhër i Kryeministrit dhe ministrit të Brendshëm. Tashmë dy zyrtarët e lartë të shtetit e kanë ?harruar? Lazaratin dhe janë fokusuar në luftën kundër vjedhjes së energjisë. Por edhe këtu si në çdo hetim tjetër, oficerët e Policisë Gjyqësore kanë nevojë për kryerjen e akt-ekspertimeve për dokumentimin e veprës penale të vjedhjes së energjisë elektrike.

investim.al