Pogradeci, qyteti që ‘fle’ buzë liqenit

24 Tetor 2014, 22:00, Aktualitet CNA

Një ndër qytetet më atraktivë për turistët në Shqipëri është padyshim Pogradeci, qyteti që shtrihet buzë liqenit të Ohrit, që ka mahnitur në kohë jo vetëm turistët e huaj apo vendas, por dhe shumë artistë që i kanë kushtuar veprat e tyre këtij qyteti dhe liqenit të tij.

Në qytetin e Pogradecit mund të shkosh nga rruga nacionale, e cila kryqëzohet në Majën e Qafë Thanës me rrugën që vjen nga pika kufitare me të njëjtin emër, nga Maqedonia.

Agjencia Kombëtare e Turizmit (AKT), në një guidë të saj rekomandon për turistët që pikërisht ku kryqëzohen këto dy rrugë të mos harrojnë të keni me vete aparatin fotografik për të fiksuar një pamje të rrallë: Liqenin e Ohrit, një perlë e vërtetë.

Pak metra më poshtë, ndaloni në gadishullin e Linit dhe në fshatin me të njëjtin emër, 25 km larg Pogradecit. Thuhet se në antikitet prindërit e perandorit Justinian e kishin Linin vendin më të pëlqyer për të pushuar. Veç pamjes magjike, këtu mund të vizitoni mozaikun në Bazilikën e Linit mbi kodër, i cili daton në shek. VI-VII p.e.s. dhe shquhet për dekoracion të larmishëm zoomorf, floreal dhe gjeometrik. Ai ka ngjashmëri me mozaikët e Durrësit të lashtë.

Rrugës për në Pogradec kalon pranë bregut të liqenit të Ohrit, i cili me origjinën e tij tektonike dhe me thellësinë që arrin deri në 285 m, është më i thelli në Ballkan. Liqeni me moshë dy milion vjeçare, i cili për vlerat e tij unikale është shpallur pasuri e UNESCO-s, ruan në gjirin e tij 17 lloje peshqish, nga të cilët 70 % janë endemikë dhe 30 % lloje butakësh ku veçohet sfungjeri i Ohrit, i cili gjendet edhe në liqenin e Bajkalit.

Buzë liqenit do të gjeni shumë restorante, bare dhe hotele komode. Shijoni peshkun dhe mënyrën e gatimit të tij tradicional dhe pikërisht tavën e famshme të Koranit, turshitë dhe ?kollofacja?. Gjithashtu, do të gjeni shumë lloje verërash, në veçanti verën tradicionale dhe unikale të butit, rakinë e famshme ?Perla? dhe ?Muskat? të Pogradecit.

Në këtë qytet, të banuar prej periudhës së neolitit dhe më pas nga fiset Ilire të Enkelejve dhe Desaretëve, (që kanë vënë zanafillën e qytetit me kalanë e Pogradecit, në një kodër 870 m. mbi nivelin e detit), mund të vini në çdo stinë të vitit, pasi ka një klimë të mrekullueshme.

Mos u largoni nga Pogradeci pa vizituar Drilonin dhe Tushemishtin, 5 km në jug të qytetit. Ujrat që dalin nga burimet e Drilonit, formojnë një liqen tjetër të vogël. Përreth ka gjelbërim krejt të veçantë që e bën këtë vend bashkë me fshatin piktoresk të Tushemishtit, një oaz të papërsëritshëm qetësie dhe pushimi. Ju mund të preheni të lumtur në këtë park të këndshëm.

Rajoni i Pogradecit është i pasur me monumente natyrore dhe historike i mrekullueshëm dhe e veçantë. Ju mund të vizitoni monumentin natyror ?Guri i Kamjes?, që është i vendosur në komunën Dardhas (në rrugën nga Pogradeci deri në Korçë, në afërsi të fshatit Osnati). Monumenti natyror është 70 m i larte dhe papritmas rritet jashtë terrenit përreth si një ?anije me vela në një det të gjelbër.? Siti arkeologjik dhe varret monumentale të Selcës shtrihen 30 km larg Pogradecit. Monumentet këtu datojnë në shekullin e IV-të dhe V-të. Varret monumentale shkëmbore gjenden në shumë pak vende të tjera në Ballkan.

ATSH-Gjergji Mima