Rama per Fox Business: Të shkojmë përpara dhe të punojmë sëbashku për prosperitet

22 Tetor 2014, 22:00, Politikë CNA

Fox Business: Kryeministri shqiptar shtyu vizitën në kryeqytetin serb Beograd, e programuar për të martën, e cila do ishte dhe vizita e parë e një kryeministri shqiptar pas pothuajse 70 vjetësh. Tensionet janë rritur midis dy vendeve pas grindjes gjatë një ndeshje futbolli javën e kaluar në Beograd midis Shqipërisë dhe Serbisë, ku një dron që mbante një flamur me simbole shqiptare fluturoi mbi stadium. Episodi shkaktoi përleshje midis dy ekipeve dhe tifozëve, gjë që vazhdoi dhe në nivele diplomatike.

Incidenti ndodhi në një kohë kur të dy kombet duan të promovojnë paqen dhe stabilitetin në Ballkan dhe të pranohen në Bashkimin Europian. Në një interviste ekskluzive për Fox Business unë bisedova me Kryeministrin shqiptar në lidhje me atë që ndodhi në ndeshjen e futbollit.

Autoritetet serbe akuzojnë vëllain tuaj si shkaktar i fluturimit të flamurit mbi stadium. Cila është përgjigja juaj për këtë?

Kryeministri Rama: Politikat e tyre nuk mund të udhëhiqen nga një ndeshje futbolli dhe nga incidentet e një ndeshjeje futbolli. Duhet të theksoj se gjithë kjo është qesharake, dhe këto akuza janë qesharake. Nuk ka asnjë mundësi që droni të jetë komanduar nga shqiptarët që ishin të pranishëm në Beograd, sepse ne nuk dërguam mbështetës për të parë ndeshjen. Më duhet, gjithashtu, të nënvizoj se sa e brishtë është paqja jonë dhe sa fort na duhet të punojmë, sepse në fund të ditës, çfarë ndodh? Një flamur fluturon mbi stadium, dhe çfarë pastaj? Është kjo një arsye që justifikon gjithë këtë dhunë, gjithë këtë urrejtje dhe gjithë këto deklarata të cilat nuk ndihmojnë që Ballkani të shihet si një rajon që e ka lënë të shkuarën pas? Dhe nga ana tjetër duhet të theksoj se ajo ç?ka ishte më shumë shqetësuese, ishin thirrjet raciste në stadium të 30 mijë vetave që për 40 minuta bërtitën ?vdekje shqiptarëve?.

Fox Business: Të dyja skuadrat vendosën të shtyjnë ndeshjen deri sa tensionet të uleshin. Rama thotë se ai është ende i vendosur ta çojë Ballkanin përpara.

Kryeministri Rama: Është vërtet për t?u trishtuar që kjo ngjarje po cenon shumëçka nga ato që kemi arritur deri tani. Por ne e kemi thënë dhe do e përsërisim se shqiptarët nuk do bien në kurthin e politikës së vjetër së urrejtjes dhe të mënyrës së vjetër të komunikimit, mbushur me një gjuhë urrejtjeje që fatkeqësisht karakterizoi autoritetet serbe gjatë ditëve të fundit. Ne besojmë ende fort se duhet ta hedhim prapa krahëve këtë ngjarje duke vendosur në radhë të parë interesin e vendeve tona, dhe interesi i vendeve tona është të shkojmë përpara dhe të punojmë sëbashku për prosperitet.

Fox Business: Presidenti rus Vladimir Putin sapo zhvilloi një vizitë javën e kaluar në Beograd. A ju shqetëson fakti se agresioni rus në Ukrainë mund të nxisë Serbinë, e cila ka vendosur të mos përdorë sanksione ndaj aleates së saj Rusisë, që të braktisë politikat aktuale dhe të rrezikojë procesin e paqes dhe stabilitetit në Ballkan?

Kryeministri Rama: Nëse kjo ndodh, do ishte shumë fatale për popullin serb, dhe do ishte një hap tjetër në drejtimin e gabuar, sepse unë besoj fort se vendi i Ballkanit është në Europë, është në botën demokratike.

Fox Business: Kryeministri Edi Rama pritet të takojë kryeministrin serb më 10 nëntor.