E fundit!

17:32 Politikë

Zbulohet propozimi i PS-së për Reformën Territoriale/ Ja në sa bashki pritet të ndahet vendi

Mbledhja e Komisionit të Posaçëm për Reformën Administrati...

Anëtarët e Këshillit të BSH në parlament

2 Shtator 2014, 17:38, Aktualitet CNA

Në Shqipëri anëtarët e Këshillit Mbikëqyrës të Bankës Qendrore do të paraqiten nga e mërkura në seanca dëgjimore në Komisionin parlamentar të Ekonomisë, pas skandalit të vjedhjes prej afër 7 milion dollarësh.

Ndërsa duke nisur nga data 5 shtator ata janë thirrur për t?u marrë në pyetje edhe nga prokuroria, në kuadër të hetimeve të nisura prej saj.

Inspektorja e Përgjithshme e Bankës së Shqipërisë, Elvira Golemi, është e para anëtare e Këshillit Mbikëqyrës, e cila është thirrur të mërkurën në një seacë dëgjimore në Komisionin e Ekonomisë.

Një ditë më pas do të jetë parardhësja e saj në këtë post, Teuta Baleta.

Komisioni i Ekonomisë ka zgjedhur të nisë seancat dëgjimore, lidhur me skandalin e Bankës, pikërisht me ato që kanë mbuluar funksionin e Inspektorit të Përgjithshëm, pasi sipas kryetarit të komisionit Erion Braçe, raportet e tyre vjetore kanë nxjerrë në pah problematika mjaft të rënda sipas tij, lidhur me funksionimin dhe veprimtarinë e Bankës.

Këto raporte i janë mohuar parlamentit prej shumë vitesh ka deklaruar zoti Braçe.

Javën e ardhshme në komision do të paraqiten edhe anëtarët e tjerë të Këshillit Mbikëqyrës dhe në përfundim, do të thirret për herë të dytë edhe guvernatori Ardian Fullani.

Zoti Braçe ka patur kritika të hapura ndaj zotit Fullani, për shkak se ai, sipas tij, nuk i është përgjigjur plotësisht kërkesës së Komisionit për informacione nga Banka.

Por që nga kjo javë anëtarët e Këshillit Mbikëqyrës së Bankës do të duhet të paraqiten edhe në prokurori.

Të premten, prokurorët e çështjes kanë thirrur anëtaren Ermelinda Meksi, e cila gati tre javë më parë kërkoi në Këshillin Mbikëqyrës shkarkimin e guvernatorit Fullani.

Një kërkesë, e cila u hodh poshtë në unanimitet nga Këshilli.

Po të premten do të pyetet edhe Inspektorja e Përgjithshme Golemi.

Ndërsa javën e ardhshme anëtarët e tjerë. Ende prokurorët nuk kanë fiksuar një datë për të marrë në pyetje guvernatorin Fullani.

Deri më tani janë 17 persona të konsideruar përgjegjës për vjedhjen në Bankën e Shqipërisë.

Hetimi ka nxjerrë në pah mos funksionimin e një sërë hallkash dhe strukturash të Bankës. Guvernatori Fullani dhe Këshilli Mbikëqyrës ka këmbëngulur në variantin se rregulloret dhe procedurat e Bankës kanë qenë në përputhje me standardet më të larta.

Por arrestimet e fundjavës së shkuar nxorrën në dritë edhe një fakt tjetër. Dy nga 7 anëtarët e Komisionit të inventarizimit në Bankën e Shqipërisë, të cilët kanë bërë verifikimet e arkës në vitin 2012 dhe 2013, kanë qenë elektricisti dhe hidrauliku i Bankës.

Mbetet i paqartë se cili ka qenë kriteri i përzgjedhjes së tyre dhe se cfarë i lidh këto dy profesione me një operacion të pastër financiar, sic është bërja e një inventari, aq më tepër i inventarit të arkës së Bankës Qendrore.

Për situatën në Bankën e Shqipërisë, është folur edhe gjatë takimit që pati sot në këtë institucion misioni i Fondit monetar ndërkombëtar./VOA