Koço Kokëdhima replikon me Mero Bazen

28 Korrik 2014, 14:42, Politikë CNA

Në vend të urrejtjes… (replikë me Mero Bazen)

Nga Koço Kokëdhima

– Nuk është diçka e re për publikun që Mero Baze shpif, sa herë ai shkruan për mua. Pavarësisht inteligjencës natyrore dhe stilit të spikatur të publicistikës së tij, ai ka nënshkruar një karrierë të dështuar për shkak të malinjitetit e keqdashjes që e karakterizon. Për Meron dhe për merot dua të them në mënyrë të qartë që unë nuk e urrej as Greqinë e as popullin grek. Greqia është atdheu i dytë për qindra-mijëra shqiptarë që jetojnë e punojnë prej dekadash atje, që kanë lindur e shkolluar fëmijët e tyre, që kanë blerë shtëpi e kanë investuar kapitale, që janë martuar e kanë bërë krushqi me ta. Unë e adhuroj popullin dhe kulturën greke, e prandaj e kam studiuar me ëndje historinë e tyre dhe kam koleksionuar qindra artefakte nga kultura greke qysh nga periudha gjeometrike dhe antikiteti e deri në kohët moderne. Kam shumë miqësi, lidhje e krushqi dhe marrëdhënie biznesi të lumtura me Greqinë dhe me grekët e Greqisë, por veçanërisht me sa vëllezër e motra minoritarë me të cilët mësuam bashkë nëpër shkolla, punuam bashkë apo jetuam në fqinjësi shembullore. Gjithmonë kam besuar dhe besoj se shqiptarët e grekët janë dy popujt më të vjetër në Ballkan që kanë jetuar prej qindra shekujsh në një marrëdhënie e harmoni më shumë se vëllazërore, e që nuk kane bërë kurrë luftëra ndaj njëri-tjetrit.

Prandaj, në çdo rast i dua të mirën Greqisë dhe grekëve e do të vazhdoj të punoj për zhvillimin e pandërprerë të marrëdhënieve miqësore midis dy vendeve tona. Sa thash më lartë nuk më pengojnë mua të jem një shqiptar me vetëdije të plotë për interesat kombëtare e shtetërore të Shqipërisë. Si deputet dëgjoj me vëmendje e mbështes interesat e popullit e qytetarëve që përfaqësoj në zonën time të jugut të Shqipërisë, pavarësisht se nga e kanë origjinën këta qytetare. Unë nuk kam tentuar të imponoj një projekt personal për Himarën. Kam mbështetur e do të mbështes dëshirat dhe kërkesat e himarjotëve për t?u qeverisur gjithnjë e më mirë në nivel vendor, me një territor e komunitet funksional. Gjithsesi mos harroni që unë jam një himarjot. Projektin për ndarjen territoriale të Shqipërisë nuk e kam propozuar unë. As hartën e ndarjes së Jugut të Shqipërisë nuk e kam propozuar unë. Në krye të këtij projekti kanë qëndruar Bledi Çuçi, Bashkim Fino dhe Edi Rama. Në çdo mbledhje të grupit parlamentar dhe tryezat ku jam ftuar kam shfaqur haptazi mendimet e mia. Bazja shpif se gjoja unë dua të faktorizohem duke luftuar kundër Dules e kundër grekeve. Dëshiroj t?i them këtij zotërisë se unë jam i realizuar dhe në paqe të plotë me veten. Nuk i urrej njerëzit. Shpirti im është i mbushur me dashuri, i shfaq pikëpamjet e mia hapur pa komplekse e pa nevojë për t?u shitur si patriot. Këtë gjë bëra edhe sot në takimin me përfaqësuesit e Partisë Socialiste të minoritetit Grek në Sarandë, në të cilën mori pjesë edhe ministri Çuçi, edhe deputeti Marto. I treguam hapur atyre të gjitha rrethanat e kushtëzimet si dhe pikëpamjet tona për të çuar përpara një reformë territoriale që nuk është kundër askujt, por është pro nevojave të qytetarëve shqiptare për zhvillim social-ekonomik dhe qeverisje të mirë vendore.