"Twitter" rikthen llogaritë e politikanëve në Serbi

19 Gusht 2022, 19:34, Tech CNA

Kompania "Twitter" deklaroi se ka pezulluar gabimisht llogaritë e disa politikanëve në Serbi.

"Në këtë rast, ne morëm gabimisht masa për të pezulluar një numër të llogarive dhe tani ato janë rikthyer. Prioriteti ynë kryesor është të mbrojmë diskutimet e shëndetshme në 'Twitter'", tha kompania në një përgjigje me shkrim për radion "Evropa e Lirë".

Më 18 gusht, kompania "Twitter" ka pezulluar llogaritë e disa deputetëve dhe politikanëve të Partisë Përparimtare Serbe, e cila është në pushtet në Serbi, dhe të një zyrtari qeveritar.

"Twitter" tha se vazhdon të zbatojë politikat e sigurisë për llogaritë në këtë rrjet social.

Në mesin e personave që u ishte pezulluar llogaria në rrjetin social "Twitter" është edhe Arno Gujon, drejtor i Drejtorisë për bashkëpunim me diasporën dhe serbët në rajon, i cili është emëruar në këtë pozitë më 2020 nga Qeveria e Serbisë.

“'Twitter' sapo pezulloi llogarinë time ku kisha 34.000 ndjekës, pa dhënë asnjë shpjegim”, tha Gujon përmes një postimi në "Facebook".

Edhe pse Gujon është i njohur për publikun në Serbi si një humanist që ndihmon serbët në Kosovë, aktiviteti i tij politik është i lidhur me lëvizjen identitare të ekstremit të djathtë.

"Twitter" pezulloi më 18 gusht, llogaritë e 12 anëtarëve të Partisë Përparimtare Serbe (SNS), të presidentit aktual, Aleksandar Vuçiq.

Në mesin e llogarive të pezulluara ishte edhe llogaria e organizatës joqeveritare CRTA që monitoron punën e Kuvendit. Në mesin e personave që u ishin pezulluar llogaritë në "Twitter" janë: Nevena Gjuriç, Sandra Bozhiç, Milica Nikoliç, Jelena Obradoviç, Aleksandar Markoviç, Kërsta Janjusheviç, Dushan Radojeviç, Jelena Zhariç-Kovaçeviç, Aleksandra Tomiç, Stasha Stojanoviç, Zoran Tomiç dhe Andrijana Vasiç.

Kompania "Twitter" po ashtu pezulloi llogaritë e disa anëtarëve të lartë të SNS-së, përfshirë edhe kryetarit të qytetit të Beogradit, Miroslav Çuçkoviç, si dhe Slavisha Miçanoviçit, që sipas mediave udhëheq ekipin për media të SNS-së.

Siç thuhet në faqen zyrtare, "Twitter" ka të drejtë të pezullojë llogari nëse këto llogari shkelin rregullat e kompanisë.

“Shumica e llogarive që ne pezullojmë, pezullohen sepse ato janë të rreme ose paraqesin rreziqe të sigurisë për Twitter apo për këto që përdor 'Twitter'-in”, thuhet në faqen e kësaj kompanie.

Në ueb-faqen e "Twitter"-it po ashtu thuhet se llogaritë mund të pezullohen nëse të njëjtat dyshohet se janë hakuar. Pezullimi në raste të tilla zgjat derisa llogaria t’i kthehet pronarit.

Kompania po ashtu mund të pezullojë llogari nëse janë në kundërshtim me politikat e kompanisë.