Vllaznia mposht mes vuajtjeve Bylisin dhe ngjitet në vendin e tretë në renditje

21 Tetor 2022, 20:07, Sport CNA

Vllaznia-Bylis 2-1 (Marku 38’, Jonuzi 71’ / Damcevski 83’ )

Vllaznia vuan, por në fund arrin që të marrë tre pikët në sfidën e luajtur në “Loro Boriçi” përballë Bylisit. Marku kaloi në avantazh kuqeblutë në pjesën e parë, Jonuzi dyfishoi shifrat në të dytën, por më pas miqtë reaguan dhe shkurtuan diferencat me Damcevskin. Mbyllet 2-1 në Shkodër, Vllaznia ngjitet në vendin e tretë në renditje në kuotën e 14 pikëve.

95’ Fund dramatik në Shkodër. Bylisi pretendon për penallti, ndërsa në aksionin pasardhës Zogovic i mohon golin Qardakut.

90’ Akordohen 5 minuta shtesë

88’ Minuta të bukura në “Loro Boriçi”. Bylisi kërkon golin e barazimit, ndërsa vendasit synojnë golin e sigurisë

83’ GOOOOOL Shënon Bylisi. Damcevski godet me kokë në zonë dhe shënon golin e parë për miqtë, duke rihapur këtë sfidë

82’ Bylisi është hedhur në sulm në kërkim të golit, që mund të rihapë këtë sfidë

79’ Provon Marku nga distanca, por gjuajtja e tij përfundon jashtë

71’ GOOOOOOOOL Shënon sërish Vllaznia. Jonuzi, i ardhur nga stoli në pjesën e dytë, godet nga distanca dhe shënon golin e dytë për shkodranët

65’ Minuta të mira për Bylisin, që është hedhur në sulm në kërkim të barazimit. Miqtë kanë krijuar disa mundësi të mira, por nuk kanë arritur që të gjejnë rrugën e rrjetës

60’ Këmbëngul Bylisi, provon edhe Kaçori me kokë, por gjuajtja e tij pritet nga Zogoviç

57’ Sërish Esquerdinja që i afrohet golit, por gjuajtja e tij është e pasaktë

56’ Rrezikon Bylisi me Esquerdinja, por goditja e tij devijohet në këndore nga Bulatoviç

52’ Tenton Gurishta nga distanca, por gjuajtja e tij është mbi kuadrat

51’ Ka nisur me ritëm pjesa e dytë në “Loro Boriçi”. të dyja skuadrat sulmojnë, Vllaznia kërkon golin e sigurisë, ndërsa Bylisi golin e barazimit

46’ Nis pjesa e dytë në Shkodër

Mbyllet me avantazhin minimal të Vllaznisë pjesa e parë në Shkodër. Një gol i Markut ka vulosur fatin e 45 minutave të para të sfidës në “Loro Boriçi”

45’ Kaçori ka një mundësi të mirë për Bylisin, por mundohet të ekzagjerojë në finalizim dhe portieri Zogoviç reagon në kohë

44’ Goli ka çliruar Vllazninë, që luan mirë në këto minuta dhe ngulmon për të shënuar golin e dytë

38’ GOOOOOOOOOL. Herald Marku shënon dhe kalon në avantazh Vllazninë. Hoxhaj këmbëngul , kroson në zonë dhe Marku dërgon topin në rrjetë falë një goditje të bukur

37’ mundësi e artë për Bylisin. Kaçori i vetëm përballë Zogoviçit nuk arrin që të kalojë portierin shkodran, por më pas loja është ndalur për një pozicion të parregullt

31’ Vllaznia nuk po arrin që të çajë mbrojtjen e Bylisit. Shkodranët kanë spostuar lojën në gjysmëfushën e mallakastriotëve, por pa arritur të krijojnë raste të pastra shënimi

25’ Vllaznia kundërpërgjigjet me Malan, por ky i fundit nuk arrin që të devijojë topin drejt portës

23’ Mundësi e mirë për Bylisin. Macolli godet nga distanca, por gjuajtja e tij përfundon ngjitur me shtyllën

20’ Juriç godet me kokë në zonë, por gjuajtja e tij është e lehtë dhe pritet pa problem nga Teqja

16’ Ka rënë disi ritmi i lojës në “Loro Boriçi”. Vllaznia mundohet që të qarkullojë topin, ndërsa Bylisi mbrohet mirë dhe zbret rrezikshëm në kundërsulm

11’ Macolli (Bylis) ndëshkohet me karton të verdhë për një ndërhyrje të gabuar në mesfushë

8’ Rast i mirë për Vllazninë. Marku kroson në zonë, Aralica godet me kokë, por pret portieri Teqja

4’ Bylisi jep shkëndijën e parë të sfidës. Kaçori shkëputet në të majtë të sulmit, futet në zonë, por gjuajtja e tij ndalet nga portieri Zogoviç

1’ Nis takimi në Shkodër

Vllaznia kërkon fitoren që mungon prej tre javësh në kampionat në sfidën e sotme kundër Bylisit në “Loro Boriçi”. Pas dy humbjeve radhazi në kampionat miqtë nga Ballshi kërkojnë të rikthehen tek rezultatet pozitive në transfertën e sotme në Shkodër.

Formacionet zyrtare:

Vllaznia: Zogoviç, Bulatoviç, Gurishta, Smajli, Marku, Kruja, Juriç, Mala, Alivoda, Hoxhaj, Aralica. Trajner: Mirel Josa

Bylis: Teqja, Trumci, Damcevski, Qoshku, Lorran, Macolli, Janku, Perreira Da Silva, Kacorri, Lajthia, Beji. Trajner. Arian Bellai