U “dogjën” nga Zekiç, Abilaliaj tregon strategjinë e re të Partizanit për trajnerin

22 Tetor 2023, 17:52, Sport CNA

Partizani do të përballojë ndeshjen ndaj Erzenit me drejtorin Arbër Abilaliaj përsëri si trajner i parë. Pas suksesit në derbi, ai do të vazhdojë të drejtojë të kuqtë të cilët presin të mësojnë emrin e teknikut të ri, i cili sipas fjalëve të Abialiajt për duhet t’u japë garanci që do të zhvillojë siç duhet ekipin.

“Ajo në derbi është një fitore e rëndësishme patjetër. Por në fund të fundit e përsëris që është një ndeshje që na ka dhënë tre pikë shumë të rëndësishme, moral shumë të lartë dhe për t’i bërë një përgatitje të mirë ndeshjes që kemi në vazhdim, kjo është e gjitha.

Ne punojmë që të kemi një vazhdimësi të mirë, nuk do të thosha patjetër, është e rëndësishme të kesh fatin me vete. Por shoh çdo ditë e çdo orë punë që bëjnë djemtë në fushën e lojës, kemi kualitet, do na vijnë edhe lojtarët e dëmtuar. Do punojmë për të krijuar një vazhdimësi të mirë, e pse jo, të shfaqin potencialin e vërtetë të këtij ekipi se janë pjekur gjërat që të nxjerrim në pah potencialin e plotë të ekipit.

Të dëmtuarit? Të them të drejtën në këto momente vazhdojnë të diferencuar ata që ishin jashtë, dikush mud të jetë afruar, por për këtë ndeshje dhe atë të ardhshmen, do të jetë e vështirë të rikuperojmë njerëzit.

Është gjithnjë një ndeshje e vështirë ndaj Erzenit duke pasur parasysh që luhet ndaj një ekipi me lojtarë të rinj, që ka në përbërjen e saj futbollistë dinamikë, agresivë, që duan të tregojnë edhe vlerat e tyre në kampionat. Ia kanë arritur deri diku, shpresojmë që nesër po themi edhe ndeshja apo lodhja psikologjike që ka pasur derbi të mos ndikojë në këtë pjesë duke pasur parasysh kohën e shkurtër. Por është kënaqësi se mendoj se do të jetë ndeshje e bukur dhe e luftuar, një ndeshje që pavarësisht emrave në fushën e lojës, do të vendoset nga shpirti i garës dhe kualiteti.

Ne jemi projektuar që kudo që të luajmë, sidomos në kampionatin shqiptar, të imponojmë lojën tonë dhe arrijmë rezultatin. Është e vërtetë që është transfertë që luhet në shtëpinë tonë, por e njëjta filozofi do të ishte dhe i njëjti mentalitet. Na ndihmon se do kemi tifozët tanë, jemi në shtëpinë tonë, e kemi për detyrë që të japim 120%.

Sa do jem trajner? Shpresojmë edhe këtë ndeshje. Kjo është një gjë që e kam thënë edhe më parë. Por momentin po i shohim të gjitha opsionet. Është krijuar një grup mjaft i mirë futbollistësh, mbi të gjitha njerëz që kanë dëshirë të punojnë, janë disponibël për të arritur rezultate të rëndësishme personale e ekipore. Njeriu që do të përzgjedhim të jetë një zgjedhje që të na japë 2-3 garanci për zhvillimin e mëtejshëm të futbollistëve që kemi, por edhe padyshim për arritjen e objektivave se është një klub që kërkon trofe dhe kjo prevalon mbi të gjitha.

Negociata kemi bërë me shumë veta, zgjedhjet tona i kemi kontaktuar, jemi në fazë bisedimesh. E kemi thënë edhe më parë që garancia, uniteti dhe gjendja psikologjike që po kalojmë nuk na vënë nxitim. Duhet të jemi shumë të kujdesshëm për njeriun që do i lëmë çelësat e ekipit që të kemi garanci për zhvillimin e mëtejshëm të ekipit dhe arritjen e objektivave të sezonit”, tha Abilaliaj.