E fundit!

18:07 Aktualitet

Komisioni i Reformës Zgjedhore kërkon shtyrjen e afatit të punës

Komisioni i Posaçëm i Reformës Zgjedhore ka bërë kërkesë K...

Të hënën, Parisi ‘skena’ e ceremonisë gala të “Topit të Artë”/ Ja favoritët e çmimeve …

15 Tetor 2022, 14:18, Sport CNA

Galaja e “Topit të Artë” do të mbahet të hënën, më 17 tetor në teatrin Châtelet në Paris, nga ora 19:00 deri në orën 20:00. Do të jepet “Topi i Artë” për meshkuj dhe femra, trofeu ‘Kopa’, trofeu ‘Lev Yashin’ dhe trofeu ‘Socrates’, event i organizuar prej vitesh nga prestigjozja 'France Football'.

Kjo gala do të ketë një veçanti në krahasim me ato të viteve të tjera. Për herë të parë do të ndahen çmime për meritat e arritura gjatë sezonit futbollistik (2021-2022). Në edicionet e mëparshme ata janë shpërblyer për meritat e arritura në vitin kalendarik.

Ceremonia e “Topit të Artë” konsiderohet si ceremonia më e rëndësishme e ndarjes së çmimeve në botën e futbollit. Ky çmim vlerëson punën e bërë nga futbollistët gjatë gjithë sezonit dhe këtë vit ka diçka të re. Leo Messi nuk është në listën e të nominuarve edhe pse ishte fituesi i edicionit të kaluar (fitues i 7 ‘Topave të Artë’). Argjentinasi nuk ka dështuar që nga viti 2006.

Për pesëmbëdhjetë vite ky trofe ka dy emra kryesorë Cristiano Ronaldo dhe Leo Messi, me përjashtim të vitit 2018 kur fitues doli mesfushori kroat Luka Modric. Megjithatë, gjithçka tregon se në këtë edicion fitues i trofeut do të jetë sulmuesi madrilen Karim Benzema.

Vitin e kaluar Alexia Putellas fitoi çmimin për femra, duke arritur kështu një moment historik për futbollin spanjoll. Këtë vit ajo është gjithashtu ndër favoritet për ta fituar, Ada Hegerberg, fituese e Champions League të fundit dhe ka fituar “Topin e Artë” (2019) dhe Beth Mead, fituese aktuale e çmimit për ‘Lojtaren më të mirë të Kampionatit Eeropian, janë rivalet e mëdha të futbollistes së Barcelonës.

Eduardo Camavinga dhe Pablo Gavi janë favoritët për të fituar trofeun ‘Kopa’, i cili që nga viti 2018 i jepet lojtarit më të mirë nën 21 vjeç. Nëse spanjolli e fiton, do të jetë viti i dytë radhazi që këtë trofe e fiton një anëtar i Barcelonës. Kujtojmë që në vitin 2021 e fitoi Pedri.

Që nga viti 2019, në këtë gala ndahet edhe trofeu ‘Lev Yashin’, i cili shpërblen portierin më të mirë në botë në sezon. Në mesin e dhjetë kandidatëve janë katër portierë nga Premier League, dy nga Liga Santander, dy nga Ligue 1 (të dy nga PSG), një nga Bundesliga dhe një nga Seria A, me Thibaut Courtois si favorit.

Familja e “Topit të Artë” vazhdon të rritet. Me këtë rast, organizatorët theksojnë krijimin e një çmimi të quajtur 'Sokrati ', i cili njeh angazhimin për të ndërtuar një shoqëri më të drejtë dhe më gjithëpërfshirëse.