Skënderbeu i "dënuar" ndaj Vllaznisë, Gjoka: Fitoren e kemi obligim, presidenti më ka premtuar...

18 Janar 2025, 14:58, Sport CNA

Skënderbeu i "dënuar" ndaj Vllaznisë, Gjoka: Fitoren e

Vendi i fundit në kampionat dhe rreziku për rënien nga kategoria, e bën jetike një fitore të mundshme të Skënderbeut ndaj Vllaznisë.

Përballen dy ekipe me objektiva të kundërt, por pritet të jetë sfidë shumë e luftuar. Në prag të këtij takimi, trajneri i Skënderbeut, Ernest Gjoka, deklaroi se skuadra e tij ka reaguar në ndeshjet e fundit, por shtoi se do të jetë një reagim më i fortë ndaj shkodranëve.

Sipas tij, korçarët janë të dënuar për të bërë gjithçka në fushë, për pozitat ku ndodhen.

“Në dy ndeshjet e fundit, sinjalet kanë qenë pozitive. Mendoj se skuadra po reagon. E kemi obligim të fitojmë ndeshjet. Na duhet me çdo kusht 3 pikëshi. Kjo është ajo që po na shqetëson më shumë në momentin që kemi kaluar dhe në atë që na pret në të ardhmen.

Me Vllazninë është një ndeshje shumë e vështirë. Është skuadër me cilësi. Ne jemi të dënuar të bëjmë gjithçka për të marrë gjithçka.

Të gjithë e dimë se çfarë duhet të bëjmë. Nesër është një ndeshje për të bërë maksimumin dhe për të marrë maksimumin. Është ndeshje e vështirë, ndaj një skuadre të mirë, por edhe ne jemi një skuadër që duam të reagojmë dhe do të reagojmë fortë.”

Gjoka pranoi se kushtet e fushës do të jenë të vështira, por theksoi se me sakrificë të madhe, lojtarët e tij mund t’ia dalin.

“Korça ka vështirësitë e saj në dimër. Fushat e vështira nuk ndihmojnë askënd. Nëse do sakrifikojmë fushë, asgjë nuk ka lidhje me fushën. Në Kupë ishte një fushë më e vështirë dhe ia dolëm. Me këtë mendësi dhe këtë dëshire duhet të jemi edhe ndaj Vllaznisë."

Trajneri bardhekuq deklaroi se pret përforcime të tjera në merkato, diçka që i është premtuar nga drejtuesit dhe presidenti

"Sigurisht që presim ende nga merkato. Drejtuesit po punojnë fortë për të sjellë lojtarë. Duhet të marrim lojtarë me cilësi, që të jenë gati. Drejtori dhe presidenti më kanë dhënë fjalën se skuadra do të përforcohet ende”, deklaroi Gjoka.

Ndeshja Skënderbeu-Vllaznia do të luhet të dielën në Korçë, duke nisur nga ora 16:30. Korçarët mbajnë vendin e fundit në renditje me 16 pikë, ndërsa shkodranët renditen në vendin e tretë me 34 pikë.