Mungon vetëm zyrtarizimi/ Sulmuesi i Kombëtares ndryshon skuadër, paguhet klauzola

17 Janar 2025, 13:36, Sport CNA

Mungon vetëm zyrtarizimi/ Sulmuesi i Kombëtares ndryshon skuadër,

Myrto Uzuni e ka mbyllur me Granadën dhe do të vazhdojë karrierën te skuadra e Austin. Mungon vetëm zyrtarizimi dhe prezantimi, por sulmuesi kuqezi mund të quhet tashmë një lojtar i ekipit amerikan.

Austin ka vendosur të paguajë klauzolën e lirimit prej 12 milionë eurosh që Myrto Uzuni kishte në kontratën e tij me Granadën. Kjo shumë e konsiderueshme ka qenë një lëvizje strategjike, e cila i ka lënë spanjollët pa shumë opsione për të mbajtur lojtarin.

Lëvizja vjen pas një periudhe tensionesh mes Uzunit dhe klubit iberik, pasi lojtari kërkonte rishikimin e kushteve financiare të kontratës së tij. Pasi Granada refuzoi të plotësonte kërkesat e tij, lojtari reagoi duke mos marrë pjesë në seancat stërvitore, një mesazh i qartë për dëshirën e tij për të vijuar karrierën diku tjetër.

Ky transferim duket si një zgjidhje që kënaq të gjithë aktorët e përfshirë. Granada do të arkëtojë një shumë të rëndësishme prej 12 milionë eurosh, e cila do t’i ndihmojë në përmirësimin e skuadrës dhe qëndrueshmërinë financiare. Nga ana tjetër, Austin fiton një lojtar të kalibrit të lartë, që pritet të bëjë diferencën në MLS, ndërsa Uzuni realizon dëshirën për një kontratë më të majme.

Marrëveshja parashikon një kontratë trevjeçare për shqiptarin, me një pagë prej 3 milionë eurosh në sezon, një shpërblim që reflekton rritjen e tij të vazhdueshme si futbollist dhe kontributin që pritet të japë për ekipin e ri.

Largimi i Uzunit nga Granada është padyshim një humbje e madhe për klubin spanjoll, pasi sulmuesi shqiptar ishte një nga lojtarët më të rëndësishëm në këtë sezon. Ai mbyll aventurën e tij te Granada me 14 gola këtë sezon, duke qenë golashënuesi më i mirë i ekipit. Më shumë se kaq, Uzuni shkroi historinë si futbollisti i huaj me më shumë gola në historinë e klubit spanjoll.

Austin, një nga klubet në rritje të MLS-së, po kërkon të konsolidojë pozitat dhe të konkurrojë në nivele më të larta. Myrto Uzuni shihet si një element kyç për këtë objektiv, duke marrë parasysh aftësitë e tij për të shënuar gola dhe për të ndërtuar aksione sulmuese. Me shpejtësinë, saktësinë dhe përvojën që ka fituar në Spanjë, ai pritet të jetë një lojtar kyç në sulmin e ekipit amerikan.