Silvinjo bën gati emrat, risi për ndeshjet e marsit

24 Janar 2025, 18:05, Sport CNA

Trajneri i Kombëtares, Silvinjo dhe stafi i tij, kanë nisur punën për ndeshjet e radhës të kuqezinjve. Marsi do të sjellë sfidat e para për Shqipërinë në kuadër të eliminatoreve të “Botërorit 2026”, me ndeshjen hapëse kundër Anglisë në “Uembli” dhe përballjen me Andorrën në “Arenën Kombëtare”. Dy sfida që do të jenë një test i rëndësishëm për skuadrën dhe për vetë Silvinjon, i cili kërkon të lërë pas zhgënjimin e Ligës së Kombeve dhe të ndërtojë një ekip konkurrues.

Pas kthimit në Shqipëri, tekniku brazilian, së bashku me ndihmësit e tij, Pablo Zabaleta dhe Doriva, ka filluar menjëherë nga puna. Në mesjavë ata udhëtuan drejt Pragës për të ndjekur derbin shqiptar në Champions Ligë mes dy mesfushorëve, Qazim Laçit dhe Kristjan Asllanit, në ndeshjen Sparta Pragë-Inter. Të dy lojtarët ishin titullarë dhe dhuruan paraqitje pozitive, duke konfirmuar se pozicionet e tyre në kombëtare janë të sigurta.

Në të njëjtën kohë, Silvinjo po analizon edhe pjesën tjetër të grupit të titullarëve, duke kërkuar alternativa dhe zgjidhje të reja taktike për sfidat e ardhshme. Pas eksperiencës së Ligës së Kombeve, trajneri kuqezi është i vetëdijshëm për nevojën e ndryshimeve dhe përshtatjeve, jo vetëm në sistemin e lojës, por edhe në përzgjedhjen e lojtarëve. Për këtë arsye, lista e tij për eliminatoret e “Botërorit 2026” mund të sjellë disa surpriza.

Një nga emrat që duket i sigurt për t’u rikthyer është Anis Mehmeti, i cili po kalon një formë të shkëlqyer me Bristol Sitin në Championship. Me 9 gola dhe një asist në këtë sezon, Mehmeti ka arritur të tërheqë vëmendjen e Silvinjos, i cili është gati t’i japë edhe një shans në ekip pas disa grumbullimeve të mëparshme. Forma e tij aktuale dhe aftësia për të ndikuar në fazën ofensive e bëjnë atë një opsion të vlefshëm për repartin sulmues të kombëtares.

Ndërkohë, Silvinjo po monitoron edhe lojtarë të tjerë që mund të jenë pjesë e listës së tij për vitin 2025. Synimi i tij është të krijojë një grup me balancë mes eksperiencës dhe energjisë së re, që mund të përballojë sfidat e mëdha si përballja ndaj Anglisë, një nga favoritët e grupit. Ndeshja në “Uembli” do të jetë një provë e vështirë, por edhe një mundësi për të treguar përmirësimet dhe për t’u përballur me një nga skuadrat më të forta të botës.