Shqipëria pa trajner, Duka zbulon një tjetër kandidat

12 Dhjetor 2022, 08:53, Sport CNA

Kombëtarja shqiptare është aktualisht pa një trajner në krye të saj. Shumë emra kanë qarkulluar në kohët e fundit, si kandidatë potencialë për të udhëhequr Shqipërinë drejt kualifikimit në Europianin e 2024-ës. Është përfolur për Ilir Dajën, po ashtu edhe Estebian Kambiason, i cili është shfaqur duke festuar në modelin ultras gjatë ndeshjeve të Argjentinës në Botëror. Ndërkohë që një tjetër kandidat është bërë i ditur nga vetë presidenti i Federatës Shqiptare të Futbollit, Armando Duka.

DUKA- I ftuar në emisionin e moderatores Hygerta Sako, Duka ka thënë se po punohet për të sjellë një emër të ri në krye të Shqipërisë, duke ia mbyllur kështu përfundimisht shanset Edi Rejës, paçka se minimalisht FSHF-ja duhet të bëjë një njoftim në lidhje me italianin, për të treguar më shumë seriozitet në këtë situatë.

Ndër të tjera, Duka tha se mes emrave, është edhe Silvinjo, ndihmëstrajneri i Tites te kombëtarja e Brazilit, edhe pse më parë, kur ka qenë e njëjta situatë, emrat e kandidatëve që janë përmendur nga kreu i FSHF-së, asnjëherë nuk kanë marrë stolin e Shqipërisë.

“Ne jemi në një fazë të rivlerësimit për të ardhmen e ekipit kombëtar dhe po shohim këta trajnerët e Botërorit se kush po shkarkohet që të marrim ndonjë. Trajneri i Portugalisë ka marrë ekipin pasi fituam ne ndaj Portugalisë me golin e Balajt. Stafi po punon, kemi marrë CV-të, por jemi në fazën që do të diskutojmë aspektin ekonomik. Mund të them se përpara Vitit të Ri do të kemi trajnerin e ri të Kombëtares. Kemi disa emra që janë diskutuar, janë emra goxha të njohur. Silvinjo, zëvendësi i Titesmund të jetë një nga kandidatët”, deklaroi Duka.

KUSH ËSHTË SILVINJO?- I lindur në Brazil, 48-vjeçari Silvinjo ka luajtur si futbollist me ekipe si Korinthias, Barcelona, Arsenal dhe Selta Vigo e Man.Siti.

Roli i tij ka qenë mbrojtës i majtë, ndërkohë si trajner më së shumti ka qenë ndihmës. Kruziero, Sport Recife, Nautiko, Korinthias dhe Inter.

Këto janë klubet ku ai ka punuar si ndihmëstrajner, ndërkohë që nga 2016 deri në 2019 ka qenë asistent i Tites në kombëtaren e Brazilit.

Ndërkohë, si trajner i parë, ai ka drejtuar disa muaj Lionin dhe një sezon Korinthiasin, në 2021-2022.