Ramadani prezantohet te Dinamo Kiev

2 Mars 2023, 10:24, Sport CNA

Reshat Ramadani pasditën e sotme u prezantua te Dinamo Kievi, një ndër skuadrat me më shumë trofe në Ukrainë, nga e cila kanë dalë emra të mëdhenj të futbollit europian, siç ishin Andrij Shevçenko, Sergerj Rebrov, etj.

Ramadani te Dinamo Kievi u transferua nga radhët e Shkëndijës së Tetovës, aty ku talenti tetovar kishte kaluar të gjitha grupmoshat dhe ishte rritur me këtë klub, pjesë e pandarë e së cilës që nga viti 1992 janë edhe tifogrupi “Ballistët”. Pikërisht dashuria ndaj tyre ka bërë që Reshat Ramadani te Dinamo Kievi ta zgjedhë numrin 92, që përshkon me themelimin e këtij grupi.

“Pse zgjodha numrin 92? Është për shkak të tifozëve të ish-klubit tim, Shkëndijës. Viti 1992 është viti i themelimit të lëvizjes së tifozëve të Shkëndijës (Ballistët). Këtë numër ua dedikoj atyre”, tha Reshat Ramadani gjatë prezantimit të tij nga ana e drejtuesve të Dinamo Kievit.

Vërtetë një hap shumë i bujshëm në karrierën e Reshat Ramadanit, i cili kishte shkruar një letër tepër emocionuese, drejtuar Shkëndijës dhe “Ballistëve”. “Është shumë e çuditshme të shkruaj për largim nga klubi ku kisha ëndërr të luaj. Një ëndërr e realizuar në moshë shumë të re dhe që më bën jashtëzakonisht krenar mua dhe familjen time.

E kam të vështirë të them se largohem nga klubi im i zemrës, mirëpo ky profesion sjell situata si kjo, fatmirësisht me leverdi edhe për mua edhe për Shkëndijën. Unë transferohem për të provuar veten në një nivel më të lartë me shpresë për të përparuar në karrierë, derisa klubi përfiton nga largimi im dhe ky fakt më bën shumë krenar.

Me këtë rast dua të falënderoj çdo person me të cilin kam punuar gjatë kësaj periudhe te Shkëndija, trajnerët nga i pari e deri tek i fundit, bashkëlojtarët te moshat e ekipi i parë. Faleminderit për çdo të punësuar në klub, ekipin mjekësor, logjistik, administratë, kryesi dhe pronarët e klubit. Falënderim dhe mirënjohje pa fund për tifozerinë e mrekullueshme tetovare me 'Ballistët' në krye që ishin mbështetje e madhe për mua në momentet më të nevojshme.

Shkëndijës i uroj shumë suksese në të ardhmen, fitore dhe tituj që ky klub dhe kjo tifozeri padyshim se i meritojnë. Unë do jem tifoz i madh nga distanca. Tani është koha për një aventurë të re”, shkruan Ramadani.