web counter
LEXO PA REKLAMA!

SHKARKO APP

App Store
Google Play

E fundit!

x

Policia mban peng derbin e titullit kampion, kaos me ndeshjet e Superiores

28 Prill 2023, 09:24, Sport CNA

Zgjedhjet lokale të 14 majit në vendin tonë do të detyrojnë sektorin e garave në FSHF të ndryshojë edhe një herë kalendarin e Kategorisë Superiore.

“Panorama Sport” shkruan se së fundmi Policia e Shtetit ka dërguar një shkresë zyrtare në FSHF, teksa i bënte të ditur datat që nuk merr dot përsipër garantimin e sigurisë në aktivitetet e futbollit në vend.

“Për shkak të zgjedhjeve vendore që do të zhvillohen, policia e shtetit ju bën me dije se nga data 12 maj deri më 16 maj, e ka të pamundur të marrë përsipër sigurinë në aktivitetet sportive”, mësohet se shkruhet në letrën që drejtoria e policisë i ka dërguar së fundmi FSHF-së.

Kësisoj, i gjithë plani i sektorit të garave për të mbyllur kampionatin më 28 maj, do të pësojë sërish ndryshime, duke filluar që nga Tirana-Partizani. Derbi i kryeqytetit ishte parashikuar për t’u zhvilluar të shtunën e 13 majit, por me ndryshimin që do të pësojë kalendari, gjasat më të mëdha janë që të luhet më 17 maj në stadiumin “Air Albania”. Lëvizjet e detyruara në kalendar do të sjellin një ngjeshje të madhe të ndeshjeve, veçanërisht në katër javët e fundit, të cilat do të luhen çdo 4 ditë.

Plani i sektorit të garave është që Superiorja të mbyllet me javën e 36-të më 29 maj, ndërsa finalja e Kupës së Shqipërisë është parashikuar të zhvillohet më 1 qershor. Ndërkohë, ndeshjet e kthimit të vlefshme për turin gjysmëfinal të Kupës, nuk do të pësojnë ndryshime. Ato janë parashikuar të luhen më 11 maj në Durrës dhe Rrogozhinë. Teuta-Tirana do të zhvillohet në orën 18:00, ndërsa Egnatia-Vllaznia në 15:00. Pritet që sot FSHF-ja të zyrtarizojë të gjitha ndryshimet në kalendar.





Lajmet e fundit nga