E fundit!

18:07 Aktualitet

Komisioni i Reformës Zgjedhore kërkon shtyrjen e afatit të punës

Komisioni i Posaçëm i Reformës Zgjedhore ka bërë kërkesë K...

Pjesë e formacionit më të mirë të 1/8-ave, dyshja e Kombëtares dominon Kupën e Italisë

21 Janar 2023, 10:20, Sport CNA

Faza e 1/8-ave e Kupës së Italisë e ka ulur siparin, duke dhuruar jo pak surpriza. Eliminimi i Milanit nga Torino dhe i Napolit nga Kremoneze ishin pa dyshim habitë më të mëdha të këtij raundi, ndërkohë që as Interi nuk e pati të lehtë dhe iu desh koha shtesë për të mposhtur Parmën e Serisë B, me Juventusin që iu fal një goli të Kiezës për të kaluar Monzën, që po shndërrohej në pengesë.

Por pavarësisht skuadrave, kjo fazë shërbeu më së shumti për t’u siguruar minuta në dispozicion të gjithë lojtarëve që nuk kishin gjetur hapësira deri në këtë pikë të sezonit dhe i tillë ishte edhe rasti i lojtarëve shqiptarë.

Kristjan Asllani, Elseid Hysaj e Berat Gjimshiti kanë qëndruar në fushë për 90 minuta (120 minuta për mesfushorin e Interit), duke qenë ndër më të mirët në fushë për skuadrat respektive, me dy të parët që kanë shkuar edhe më tej duke qenë dy prej më të mirëve të të gjithë fazës.

Faqja e statistikave “Sofa Score” ka publikuar 11 lojtarët më të mirë të këtij raundi të Kupës së Italisë, bazuar në performancën dhe numrat e secilit.

Në rreshtimin 3-1-4-2 të zgjedhur nga faqja është Asllani i vlerësuar me notën 8, mesfushori më i mirë para mbrojtjes, me Hysajn që është vlerësuar me 7.7 në krahun e majtë.

Por ndërkohë që Asllani e rrëmbeu skenën, duke qenë fari i mesfushës zikaltër me 96% saktësi në pasimet e tij, Hysaj kishte një paraqitje në kufijtë e perfektes në prapavijë, me 5 ndërhyrje, 2 duele të fituar dhe 1 spastrim, të cilave u shtohet 1 driblim dhe 86% saktësi në pasime.

FORMACIONI – Asllani shoqërohet në këtë 11-she nga shoku i tij i skuadrës, Açerbi, ashtu si Hysaj nga Luis Alberto, me formacionin që dominohet nga Atalanta me Luis Murielin, Zapatën e Lukmanin, kundërshtarët e radhës të Interit në çerekfinale.

Kështu, ndërsa Asllani do të ketë një derbi shqiptarësh me Gjimshitin, një tjetër duel interesant është ai i Hysajt që do të përballë bardhezinjtë e Juves.

Për të plotësuar formacionin edhe Tonali e Huan Zhezus, të vetmit të shpëtuar të Milanit e Napolit, me Milinkoviç-Saviç e Shurs që ishin në krahun tjetër heronjtë e Torinos në fitoren e bujshme ndaj kuqezinjve të Piolit.