“Mesi si Majkëll Xhordan”, Çavi vazhdon të ruajë miqësinë me Leon: Duhet dhe një “last dance”

1 Prill 2023, 11:07, Sport CNA

Deklaratat e zëvendëspresidentit të Barcelonës, Rafa Juste, që pranoi publikisht interesimin e klubit “blaugrana” për Lionel Mesin nuk kanë kaluar pa u komentuar dhe nga trajneri Çavi Hernandez.

Deklaratat e numrit dy të klubit “blaugrana” kanë ardhur vetëm pak minuta para se Ksavi të shfaqej në konferencën për shtyp para ndeshjes kundër Elçes.

Çavi është munduar të tregohet i rezervuar, teksa konsideron se tani nuk është koha për të folur për këto çështje, ndonëse nuk e ka fshehur se mban kontakte me argjentinasin dhe se do të dëshironte ta kishte nën urdhrat e tij.

“Unë mendoj se nuk është koha për të folur për kthimin e Leos. E kam mik dhe flas shpesh me të, por nuk është koha e duhur, as për të mirën e Mesit dhe as për të mirën e klubit. Është një temë me të cilën po merremi, kam shumë miqësi, por nga këtu derisa të bëhet, ka mbetur një botë”, ka shpjeguar Çavi.

Trajneri i Barcelonës, gjithashtu ka ndarë fjalët e zëvendëspresidentit Rafa Juste, në të cilat ai siguroi se ishte i dashuruar me Leo Mesin.

“Fjalët e tij kanë qenë të sinqerta, mos e keqkuptoni. Sa për Mesin e kam parë atë të rritet. Ai është shembullor. Është normale që në radhët e drejtuesve apo të tifozëve të ketë iluzion. mendoj se duhet dhe një ‘last dance’ (një kërcim i fundit), si Majkëll Xhordan. Është normale që njerëzit të jenë të emocionuar”, tha trajneri i Barcelonës.

Duke qëndruar sërish në temën e diskutimeve për Leon, Çavi ka shtuar: “Shpresoj se mund ta shoh Leon përsëri te Barça në çfarëdo mënyre që të jetë. Do të isha i pari që do të lumturohesha për rikthimin e tij. Është klubi i jetës së tij, ai është lojtari më i mirë në histori, por nuk është koha. Ne jemi një muaj larg nga mundësia e të fituarit të dy titujve. Ndaj është më e ndershme dhe më e shëndetshme të flasim për Elçen (La Liga), Realin e Madridit… dhe gjithçka që vjen”.

NË DORËN E MESIT – Në një konferencë ku Mesi ka qenë në qendër të vëmendjes, trajneri katalanas e ka bërë të qartë se nuk është përfshirë në manovra për të bindur Mesin për t’iu bashkuar katalanasve.

“Rikthimi ose jo i tij në Barcelonë nuk varet nga unë, varet nga Mesi, nga lumturia e tij, nëse ai dëshiron të kthehet dhe ka këtë vullnet… Unë kam një marrëdhënie miqësie dhe besimi dhe, nëse ai merr vendimin për t’u kthyer, unë jam i kënaqur. Do të jem i pari që do ta uroj. Por për momentin nuk ka asgjë. Nëse vazhdojmë me këtë temë, me këto biseda ne po i bëjmë një dëm Leos dhe klubit. Kjo do të varet nga shumë faktorë”, tha Çavi.