E fundit!

13:08 Aktualitet

Vrasja e efektivit/ Xhaxhai i Enea Mekollit ngre akuza: Ishin pa asnjë lloj mbrojtjeje

Xhaxhai i efektivit të vrarë, Enea Mekolli, Hazbi Mekolli,...

Laçi dominon dhe fiton në Mal të Zi, perla e Mazrekajt kualifikon kurbinasit

14 Korrik 2022, 23:15, Sport CNA

Goli i Mentor Mazrekajt i dha fitoren dhe kualifikimin Laçit ndaj malazezëve të Iskrës. Pas barazimit 0-0 në “Elbasan Arena”, bardhezinjtë e Shpëtim Duros arritën të fitonin minimalisht në ndeshjen e luajtur në Podgoricë, duke siguruar kalimin në raundin e dytë të Conference League.

Ashtu si në ndeshjen e parë, Laçi ishte më këmbëngulës, dominoi dhe u shpërblye, duke vijuar paraqitjet pozitive në arenën ndërkombëtare. Minutat e para të ndeshjes ishin të ekuilibruara me kurbinasit më kërkues, por në anën tjetër dhe vendasit tentuan që të lënë shenjë, por pa e vënë në rrezik serioz portierin Dajsinani.

Në të 19-ën u regjistrua episodi që bëri diferencën, me Mentor Mazrekajn që tregoi klasin e tij. Kapiteni ekzekutoi në mënyrë perfekte një goditje dënimi që nuk u devijua dot nga askush, me topin që u ndal në trekëndëshin e portës së Iskrës.

Laçi në avantazh, dhe gjithçka u bë me e lehtë për skuadrën kurbinase. Në vijim e deri në fund, bardhezinjtë humbën disa raste të pastra. Adeleke dhe Guindo ishin rrezik potencial në kundërsulme, megjithatë pa arritur të gjenin rrugën e rrjetës.

Pjesa e dytë kishte të njëjtën fytyrë si e para, me Laçin që e menaxhoi mjaft mirë ndeshjen, duke marrë rezultatin që i mjaftoi për të marrë kualifikimin në raundin e dytë. Shumë raste të pakonkretizuara, por në fund festë shqiptare në Podgoricë.

Hera e pestë në gjashtë vitet e fundit që kurbinasit arrijnë që të kalojnë minimalisht një tur, duke dëshmuar se në Europë e kanë recetën e suksesit. Kundërshtarët e radhës për Laçin do të jenë moldavët e Petrocub, të cilët eliminuan maltezët e Florianës.

Conference League, raundi i parë

ISKRA-LAÇI 0-1 (Mazrekaj 19′)