Juventusi "hakmerret" për humbjen në Superkupë, zhgënjen Milani

18 Janar 2025, 20:15, Sport CNA

Juventusi "hakmerret" për humbjen në Superkupë,

Juventusi mposhti Milanin me rezultatin 2-0, në sfidën e javës së 21-të në Serinë A. “Hakmarrje” e bardhezinjve, për humbjen me përmbysje në gjysmëfinalen e Superkupës së Italisë, në fillim të muajit janar.

“Zonja e Vjetër” ishte dominuese në shtëpi, sidomos në pjesën e dytë dhe ia doli të marrë tre pikë të arta.

Shkëndijën e parë e dha Mbangula, gjuajtja e të cilit shkoi mbi tranversë. Kupmajners provoi gjithashtu me një predhë nga distanca, por edhe tentativa e tij nuk kishte saktësinë e duhur.

Në minutën e 19-të, Tijjani Reijnders kishte mundësinë e artë për të zhbllokuar takimin. Pas një skeme perfekte nga goditja e këndit, mesfushori holandez ekzekutoi një penallti në lëvizje, por topi u ndal nga Locateli dhe shkoi jashtë.

Dy minuta më vonë, vendasit iu afruan avantazhit me Gatin, gjuajtja e të cilit me kokë shkoi jashtë.

Di Gregorio bëri heroin për Juventusin në minutën e 27-të, duke i pritur një gjuajtje shumë të fortë në zonë Leaos. Në vazhdim të aksionit nuk shënuan dot as Theo e Musah.

Në kundërsulmin e skuadrës së Motta-s, Nico Gonzalez u shfaq në zonën e Milanit, por gaboi në momentin e fundit, ku u ndal nga Tomori.

Maignan ishte vendimtar me një pritje të shkëlqyer në minutën e 36-të, ndaj Kenan Yildiz. Në fundin e pjesës së parë, Teo Hernandez kishte një mundësi të mirë për të gjetur golin, por edhe këtë herë gjuajtja u ndal nga mbrojtja.

Fraksioni i parë u mbyll pa gola, ndërsa i dyti ishte histori tjetër. Në minutën e 53-të, Menjo me dy pritje spektakolare ndaj Weah dhe Koopmeiners, mbajti në lojë Milanin.

Megjithatë portieri francez nuk mund të bënte asgjë në minutën e 59-të. Pas një aksioni të bukur, Mbangula lëshoi një gjuajtje të fortë në zonë dhe i ndihmuar nga një devijim i Emerson Royal, topi përfundoi në rrjetë.

Ky gol i dha besim Juventusit, që nuk i ndali sulmet. Vetëm 5 minuta më vonë, Weah, u shfaq në zonë, pas një topi të rrëmbyer në mesfushë dhe pasi dribloi Tomorin, ia doli ta dërgojë topin në rrjetë, për herë të dytë këtë ndeshje.

Reagimi i Milanit ishte i vakët, me kuqezinjtë që dukeshin të pafuqishëm për të sulmuar. Në fund, festa ishte për Juventusin, që falë kësaj fitoreje, merr vendin e katërt me 37 pikë të grumbulluara.

Në krahun tjetër, për trajnerin Kosensao kjo është humbja e parë në stolin e Milanit, me kuqezinjtë që mbajnë vendin e tetë në renditje, me 31 pikë.