Gvozdenoviç: Skënderbeu më bind, jemi gati për Superioren

18 Gusht 2023, 13:53, Sport CNA

Skënderbeu ka mbyllur përfundimisht testet miqësore në këtë fazë përgatitore dhe normalisht në këtë pikë është koha për një konkluzion përfundimtar nga stafi bardhekuq.

Pas shumë miqësoresh dhe provash në formacion, trajneri i Skënderbeut, Ivan Gvozdenoviç, ka dalë në konkluzione të qarta në lidhje me ekipin që ka në dispozicion dhe pritshmëritë për sezonin e ri në Superiore. Në një prononcim të dhënë për “Panorama Sport”, trajneri serb i Skënderbeut flet për aspektet pozitive që ka parë në ekip gjatë një muaji e gjysmë përgatitjesh.

“Mund të them se jam i kënaqur me gjithçka që kemi bërë në këtë fazë përgatitore, por edhe në ndeshjet miqësore që kemi zhvilluar gjatë kësaj kohe. Ajo që më gëzon më shumë në këtë moment është se kemi fituar Randin, lojtar i cili është bashkuar me ne dhe ka treguar një formë të mirë fizike. Ky është një tregues që na bën të mendojmë se lojtari ka zbatuar gjithçka që ne kemi kërkuar gjatë kësaj periudhe që ka qenë larg skuadrës. Ta mbyllësh me 5 gola testin e fundit është diçka pozitive. Nga ana tjetër, edhe Fleçer është disi më mirë, por ende nuk është në 100% të formës së vet. Edhe Diabi tregoi cilësi, por ende duhet të shohim. Ai nuk ka firmosur ende për ne dhe do të vlerësojmë gjithçka deri në fund të gushtit. Merkatoja jonë është ende e hapur dhe do të shohim se çfarë do të ndodhë deri në fund”, theksoi trajneri i Skënderbeut.

Në lidhje me sezonin e ri, trajneri bardhekuq është besimplotë se si do të paraqitet ekipi i tij në këtë edicion. Me shumë alternativa dhe me një mbrojtje të blinduar, tashmë Gvozdenoviç është i bindur se ekipi i tij do të reagojë mirë, duke filluar nga starti i sezonit.

“Ne jemi thuajse gati dhe kjo është diçka që duket. Nuk e kam fjalën vetëm për fitoren e fundit, pasi ishte një test, por i referohem paraqitjes në tërësi të ekipit. Mund të them se jemi të plotë në çdo repart dhe mbrojtja tani është e blinduar. Kjo më bën të jem komod. Nga ana tjetër, do të duhet të vendosim edhe për skemën, pasi kemi disa variante loje. Kemi edhe dy javë kohë për t’i dhënë dorën e fundit përgatitjeve në ekip dhe do të jemi gati”, përfundoi trajneri i Skënderbeut.